arcumander quista paginaemailFacebookTwitter

Declaraziun d'impostas

Chi es oblio?

Persunas natürelas sun obliedas d'inoltrer la declaraziun d'impostas, scha:

  • ellas haun domicil u sogiuorn tenor dret d'impostas i'l chantun Grischun

Sogiuorn tenor dret d'impostas haun persunas chi, melgrô ün'interrupziun temporera, as trategnan i'l chantun Grischun:

  • düraunt almain 30 dis ed exerciteschan ün'activited da guadagn in Svizra
  • düraunt almain 90 dis, sainz'exerciter ün'activited da guadagn in Svizra
  • e sun possessuors, partenaris u usufructuaris d'intrapraisas in Grischun
  • e mainan ufficinas i'l chantun Grischun
  • e sun proprietaris d'immobiglias u haun drets d'usufrüt vi d'immobiglias in Grischun
  • e faun commerzi cun immobiglias in Grischun u intermedieschan telas
  • ed exerciteschan ün'activited persunela e vegnan indemnisedas per quista

Formulers d'impostas na consegnos

Scha qualchün nun inoltrescha ün dals formulers da las impostas nu deliberescha que dal oblig d'inoltrer la declaraziun d'impostas infra il termin (art. 127 Ledscha d'impostas pel chantun Grischun, LT). Chi chi nun ho survgnieu ils formulers po retrer quels tar l'uffizi d'impostas da la vschinauncha u tar l'administraziun d'impostas dal chantun Grischun a Cuira. Conjughels suottascrivan cumünaivelmaing la declaraziun d'impostas. Conjughels, chi vivan in ün alach giuridicamaing ed effectivmaing na separeda sun oblios cumünaivelmaing da pajer impostas. Guadagn e faculted vegnan quintos insembel sainza resguarder l'uorden dals bains. Tuots duos conjughels sun eguels illa procedura ed haun da suottascriver cumünaivelmaing. Scha la declaraziun d'impostas es suottascritta be dad ün conjughel, vain concess ün termin al conjughel chi nun ho auncha suottascrit. Scha'l termin scrouda sainza esser ütiliso, vain suppuonieu il rimplazzamaint traunter conjughels tenor cunvegna (art. 123a Ledscha d'impostas pel chantun Grischun LT, art. 131 al. 2 Ledscha federela davart l'imposta federela directa).

Per la declaraziun d'impostas vela scu termin generel per piglier zieva la suottascripziun dal conjughel la data dals 30 avrigl. Per declaraziuns inoltredas pü tard vain concess ün termin da 20 dis per piglier zieva la suottascripziun.