arcumander quista paginaemailFacebookTwitter

Uffizi forestel

Collavuraziun da las gestiuns forestelas e las gruppas per lavuors cumünelas da las vschinaunchas da S-chanf e Zuoz

A partir dals 1. schner 2014 collavureschan las vschinaunchas da S-chanf e Zuoz illas spartas uffizis forestels e las gruppas da lavuors cumünelas. Il silvicultur da S-chanf maina ils duos uffizis forestels. Il silvicultur da Zuoz es nouv il mneder da las gruppas da lavuors scu eir da l‘infrastructura da las duos vschinaunchas. Üna cumischiun da coor-dinaziun chi‘s cumpuona our dals duos presidents cumünels e’ls duos chanzlists garantischa la direcziun operativa e la collavuraziun economica traunter la gestiun dal servezzan tecnic e la gestiun forestela. Ils depütos dals duos cussagls cumünels fuorman la cumischiun accumpagnatorica strategica.

Respunsabilted a partir dals 01.01.2014:

Uffizis forestels S-chanf e Zuoz

Persuna da contact:
Francesco Pietrogiovanna
Tel. Nr. : 079 682 04 41

• Uffizis forestels
• Rumida da naiv a S-chanf e filielas
• Progets vias da god e vias d‘alp

Concept da chüra per nos god

Persistenza: Ella es la maxima suprema. La noziun «persistenza» significha per nus da na racoglier dapü laina cu que chi crescha zieva. La quantited da laina vain calculeda per tuot il territori da la vschinauncha.

"Persistenza" voul dir per nus da na racoglier dapü laina cu que chi crescha zieva
"Persistenza" voul dir per nus da na racoglier dapü laina cu que chi crescha zieva

Ringiuvnimaint: Per motivs istorics sun nos gods fich inveteros. Gods stabils, sauns e da valur ecologica consistan da püs s-chelins d’otezza e da tuots geners da plauntas chi creschan natürelmaing.  Quist es eir il böt dal sclarimaint dal god. Per pudair trer darcho las plauntas dal plaun bass e mezzaun dal god as stu s-chaffir plazza. Cun schmerdscher bos-cha veglia ed instabila pudain nus metter a disposiziun als bös-chs giuvens la clarited, il chod e las substanzas nudritivas. Sün quist'otezza drouva que pazienzcha fin cha'l success dvainta visibel.

Concept territoriel dals tagls da laina: Scha pussibel pruvains nus da planiser ils tagls da laina da maniera ch’els vegnan collios successivmaing. Uschè supportan las bes-chas meglder ils disturbis.