arcumander quista paginaemailFacebookTwitter

Chalandamarz 2018

a Zuoz / Madulain

Stimos indigens e giasts da Zuoz e Madulain,

gugent Als infuormains da l’importanza e l’andamaint dal Chalandamarz 2018 (latin:„calaendae martii“; cumanzamaint da l’an): da pü bodun scu auncha hoz vegnan tschernidas a Zuoz las autoriteds cumünelas als 1. marz.

1. Prouva da Chalandamarz
Duos dumengias aunz ils 1. marz faun ils mats ün gir intuorn mincha bügl da nossa vschinauncha cun maruns, plumpas, zampuogns, talacs, s-chellas u brunzinas intuorn lur vainter. Quista vegl’üsaunza deriva dal temp pajaun e serviva a sieu temp per promouver la früttaivlezza (bügls), scurranter noschs spierts da l’an passo (canera cun s-chellas e schlupper geischlas) e scu muostra per servezzan da mercenari (drizzer oura seguond grandezza dal mat e da la s-chella, ch’el es bun da purter).

Il cortegi parta a las 11.00 tal Mulin vegl ed intuorn las 11.30 schloppan ils “patruns”, ils mats chi vegnan our da scoula, lur geischlas sün plazza da scoula. Que vela la spaisa da visiter quist bel üsit culturel e na schmancher l’apparat da fotografer!
Quist an ho lö la Prouva da Chalandamarz in dumengia, ils 18 favrer 2018 da las 10.30 fin las 12.00.

2. Chalandamarz

Mardi, ils 27 favrer cumainza il Chalandamarz 2018 a las 24.00 tal „Vout“ da la chesa Planta cull’inscripziun dals noms da patruns e patrunas e cun schlupper las geischlas. Marculdi, ils 28 favrer vaun ils patruns a partir da las 03.00 a clamer oura ils mats da scoula cun s-chellöz da talacs. A las 07.00 parta il cortegi sün Plaz. A las 12.45 as prepara la charreda cun chavals davaunt la Crusch Alva, per partir a las 13.00 vers Madulain.
Ils 1. marz vegnan schluppedas las geischlas intuorn las 11.00 sün plazza da scoula. Zievamezdi ho lö il bal d’iffaunts. Tuot la populaziun da vschinauncha fo festa culs nouvtschernieus da las autoriteds cumünelas!

Per plaschair clicker süls seguaints pdf's per telecharger ils programs chi muossan la data, cur cha’l cortegi riva tar Lur chesa per chanter las bellas chanzuns da Chalandamarz. Ch’els laschan per plaschair entrer ils mats in Lur sulèr u ch’els vegnan our da Lur abitaziun a tadler il chaunt. Zieva il chaunt vain ramasseda üna collecta per finanzcher il viedi da scoula – già ouravaunt ün grazcha fich per Lur donaziun!

Plan da Zuoz
Plan da Madulain
Program Chalandamarz 2018

Zuoz, favrer 2018/gb
Cumischiun da Chalandamarz: L. Magni, G.Bott, G.R.Caprez

inavous