arcumander quista paginaemailFacebookTwitter

Decisiuns dal cussagl cumünel meg e gün 2018

In occasiun da sias tschantedas düraunt ils mais da meg e gün 2018 ho il cussagl cumünel da Zuoz traunter oter decis il seguaint:

Fabricas

  • Rudolf Hess, Laupen: per la sanaziun d’ün’abitaziun suot il tet e l’integraziun d’üna lucarna, Chesa Chaunt da Crusch
  • Per-Anders Benthin, Pfäffikon: per la sanaziun incl. annex, Chesa Pitschna, Surmulins
  • Kirikan AG, Schlarigna: per müdamaints vi dal proget da la garascha per autos, Curtinellas
  • Club Alpin Svizzer SAC, secziun Bernina: per la renovaziun ed ingrandimaint da la chamanna d’Es-cha, deliberaziun dumanda BAB
  • Adrian Roman Casty, Berna: per la renovaziun da l’acla Schucatitta, deliberaziun dumanda BAB

Vias, punts ed ovas
Agir construcziun marchapè Curtin Plavaunt
Siand cha l’ultima chesa i’l quartier Curtin Plavaunt vain termineda in utuon es da fer ponderaziuns scu lascher construir la part finela dal marchapè lung la via veglia chantunela. Il mneder tecnic organisescha ün supralö per invier la procedura.

Surdeda lavur rumida da naiv

In connex culla desditta da la collavuraziun culla firma Kohler as vaiva scrit oura la rumida da naiv per üna part da la vschinauncha in meg 2018. Duos interessents haun inoltro ün’offerta. Il cussagl decida da surder l’incumbenza al offerent pü favuraivel, dimena a sar Andri Casty.

Agricultura
Custodia chamanna Laviruns
Sar Claudio Bazzell ho fat desditta da sia funcziun scu custodi da la chamanna sü Laviruns. Il cussagl ingrazcha per la lavur prasteda e decida da vulair surder quista lezcha al president scadent chi füss pront da surpiglier quist’incumbenza. Ils detagls sun reglos aint il reglamaint pertuchant.

Educaziun e cultura
Tscherna d’üna magistra per la scoula primara
Zieva la desditta dal magister Corsin Näff s‘ho dalum publicho la plazza, ma a nu sun entredas üngünas annunzchas. Our da quel motiv as ho tschercho il discuors cun duonna Claudia Bezzola, chi füss pronta d’instruir per ün ulteriur an, adonta ch’ella füss già pensiuneda. Ad es previs ch’ella survain ün pensum da 70%. Il cussagl es perinclet cul agir e decida d’impiegher a duonna Claudia Bezzola eir per l’an scolastic 2018/2019.

Decisiun cuntinuaziun program da scolaziun gruppa da gö
Dal 2016 vaiva il cussagl decis da vulair fer ün temp da prouva da duos ans per quist program da scolaziun da lingua per iffaunts da la gruppa da gö. Siand cha’ls duos ans sun passos decida il cussagl da prolunger il temp da prouva per quatter ans e da valüter il success da las imsüras insembel cullas mussedras da scoulina.

Commerzi e misteraunza, turissem
Infurmaziun andamaint SSZ AG
Sar Luis A. Wieser ho do differentas infurmaziuns sur da l’andamaint da l’inviern passo. L’inviern passo vaiva cumanzo fich bain, cun bgera naiv e bgers giasts. Las frequenzas d’eiran fich allegraivlas (dec. +80%, schner + 28%, favrer +6%), unicamaing il marz d’eira fich debel (- 24%). Totel ho que gieu 15% dapü giasts süls runels da Zuoz, illa media da 10 ans però do que be ün plus dad 1%. Il resultat vess pudieu esser meglder scha l’ora, impustüt sur las fins d’eivnas, füss steda pü bella. In generel d’eira que üna stagiun sainza surpraisas chi ho eir mno davart da la situaziun finanziela ad ün resultat egualiso. Las pendiculeras da l’Engiadin’Ota haun lantscho ün nouv model da predschs per cartas da di cun ün sistem dinamic. Quist model gnaro applicho eir per Zuoz.

Finanzas
Dumandas da sustegn finanziel
Ils duos fradgliuns Anja e Maurus Lozza haun gieu üna fich buna stagiun d’inviern 2017/2018 e sun gnieus promovieus (Anja) u confermo (Maurus) i’l C-Kader da Swiss Ski dals passlungists. Per ch’els possan cuntinuer cun lur sport haun els inoltro üna dumanda da sponsoring. Il cussagl decida da vulair sustegner ils duos giuvens atlets indigens finanzielmaing e da stipuler ün contrat da sponsoring chi cuntegna la preschentscha dal logo da Zuoz sün chapütschas e frunteagls.

Administraziun cumünela
Decisiun agir a reguard successiun mneder tecnic
Il mneder tecnic, sar Gudench Mischol, ho decis d’anticiper sia pensiun e da glivrer sia plaiv fingià la fin da quist an. Our da quel motiv es da cumanzer a tschercher dalum ün successur per garantir üna surdeda da las lavuors ed incumbenzas regleda. A vain elavuro ün inserat chi dess gnir publicho illas medias regiunelas e chantunelas. Il termin d’annunzcha es ils 30 gün 2018 uschè cha l’evaluaziun po avair lö in lügl.

Infurmaziuns our da tschantedas da cumischiuns
Signalisaziun Via Dimvih d’Aguêl: la pulizia chantunela ho reclamo cha la signalisaziun saja gnida alluntaneda sainza spetter giò la procedura leghela. Il cussagl decida da lascher monter la signalisaziun e d’invier la procedura leghela per zieva pudair abolir il sens unic sün quista via.

Bouda Muntatsch: üna bouda sü Muntatsch ho chaschuna grands dans. L’uffizi da prievel da natüra ho registro ils dans, ils privats as stöglian metter in colliaziun culla sgüraunza da dans elementers.

Concours Hippique: ad ho gieu lö ün supralö per valüter las imsüras necessarias. Il schlargiamaint da la via da l’inline chaschuna cuosts ots chi füssan d’integrer in ün prossem preventiv. A reguard il provedimaint d’ova sun avaunt maun duos offertas. Il cussagl es pront da deliberer ün credit da cussagl sur frs. 12‘000.00 per lascher fer quistas lavuors. Il champ da golf adüna avair priorited, siand cha la lingia principela es in possess dal Golf.

Baunchins e-lounge: zieva cha’l cussagl vaiva decis da perseguiter quist proget es intaunt inoltreda l’offerta per duos baunchins. Il cussagl decida d’installer ün sün Plaz e l’oter giò’n Resgia.

Müdeda Alp Timun: cul proget da fer müdeda da la chascharia da l’alp Timun our in Es-cha Dadoura ho que do ün discapit in connex cullas finanzas. L’import da frs. 150‘000.00 d’eira previs aint il preventiv 2017. Siand cha las lavuors nu sun però gnidas fattas düraunt il 2017 nun ho que neir na do quints. Las lavuors sun gnidas effettuedas pür dal 2018, ma deplorabelmaing s’ho schmancho d’integrer l’import aint il preventiv 2018. Ad es d’infurmer la radunanza cumünela cha’ls cuosts vegnan chaschunos pür quista an. L’infurmaziun dess gnir deda illa prosma radunanza cumünela.

Analisa da prievels: tuottas las vschinaunchas haun l’oblig d’elavurer ün’analisa da prievels. Il cussagl decida da lascher fer que insembel cun S-chanf, chi ho da sia vart fingià decis da vulair fer que cun Zuoz.

Repower/Rait da fibra optica: la vschinauncha vaiva decis da pajer üna contribuziun da max. frs. 3‘000.00 a mincha privat chi’s tacha vi da la rait da fibra optica suot la cundiziun cha vain fat ün contrat da min. 24 mais culla Mia Engiadina. L’import gniva calculo fin sül cunfin da la parcella dal privat. Quist agir chaschunescha però difficulteds a la Repower per elavurer offertas e zieva impustüt per fer giò quint. Our da quists motivs decida il cussagl cha la subvenziun da max. frs. 3‘000.00 vain simplamaing pajeda per attach, independent dal cunfin da la parcella.

Varia
La visita da terms ho lö ils 14 e 15 lügl 2018.

La statistica dal parkegi Centrel dals prüms 12 mais demuossa cha impustüt düraunt ils mais december, schner, favrer e marz vain fat ferm adöver da la garascha. Las tariffas dessan gnir valütedas düraunt ils prossems mais, insembel cullas tariffas dals parkegis publics in vschinauncha.

La controlla d’ova demuossa üna fich buna qualited da l’ova potabla.

Il president Flurin Wieser piglia cumgio zieva nouv ans lavur scu president cumünel da Zuoz. El ingrazcha als collegas cusgliers per la buna collavuraziun e per las bellas uras passantedas in cumpagnia e giavüscha a tuots tuot il bun per l’avegnir.

Zuoz, 3 lügl 2018/cd

inavous