arcumander quista paginaemailFacebookTwitter

Decisiuns dal cussagl cumünel avrigl 2018

In occasiun da sias tschantedas düraunt il mais avrigl 2018 ho il cussagl cumünel da Zuoz traunter oter decis il seguaint:

Fabricas

A las seguaintas dumandas da fabrica ho il cussagl aderieu e relascho ils permiss:

  • Michaela e Thilo Sauer, Brail: dumanda per pudair prolungir il permiss da fabrica, Mariöl
  • Vschinauncha da Zuoz: per la sanaziun da la Via Ritscha
  • Simon Salzgeber, S-chanf: per integrer üna lingia da s-chodamaint illa Via Ritscha
  • Kirikan AG Zuoz: per la construcziun d’üna ufficina d‘autos, dret da fabrica parcella 3064 in Curtinellas
  • Letizia Könz, Turich: per l’installaziun da pumpas da s-chodamaint, Mariöl

 

Vias, punts ed ovas
Agir a reguard furmaziun entredas vschinaunchas
I‘l preventiv es aint ün import da frs. 200‘000.00 per la furmaziun da las entredgias in vschinauncha in Aguêl e giò’n Staziun. L’entreda da Madulain vers San Bastiaun nun es urgiainta. Zieva cuorta discussiun decida il cussagl da vulair realiser be l’entreda vers Aguêl e cha l’indschegner Peter L. Plebani dess elavurer ün proget, scriver our las lavuors e zieva eir mner la fabrica. In Staziun dess il prüm gnir optimeda inavaunt la signalisaziun pel parkegi Centrel (iglüminaziun dal muossavia) e cun realiser adattamaints vi da la via.

Agir a reguard rumida da naiv
D‘utuon as vaiva fat desditta a l’ARGE da la rumida da naiv siand cha la ditta Kohler es ida davent da Zuoz. La collavuraziun traunter la vschinauncha e la ditta Rocca + Hotz AG dess gnir mneda inavaunt scu fin cò siand ch’ella funcziuna fich bain ed as ho verificheda. La publicaziun ufficiela vain fatta la fin d’avrigl 2018. Be impressaris e purs da Zuoz sun invidos a der aint offertas.

Agir a reguard signalisaziun da trafic e zona d’inscunter Minz
Il cussagl discuta diversas propostas scu cha’s pudess optimer la signalisaziun da trafic in vschinauncha. Ün’imsüra prevezza ün nouv sens unic sü per la via vers Somvih e Chaunt da Luf, ün’otra ün amegldramaint da la signalisaziun per camiuns ed autos in Plagnoula. Per la s-chaffida d’üna zona d’inscunter aint il Minz cun tuot Plaz però sainza la Via Maistra as stu elavurer ün stüdi insembel cun ün büro da planiseder. Ils cuosts per ün tel proget s’amuntan sün ca. 15‘000.00. A segua üna discussiun animeda sur dal sen da las singulas imsüras. Aunz cu s-chaffir üna zona d’inscunter es da fer ponderaziuns a reguard la scoula e’l turissem. Il cussagl decida da metter inavous la zona d’inscunter, da pruver d’optimer la signalisaziun in Plagnoula e da na invier la procedura per s-chaffir nouvs sens unics in vschinauncha. In Chaunt da Luf dess gnir installo il quintadur da trafic zieva las vacanzas da meg.

Commerzi e misteraunza, turissem
Proget E-Lounge scu proget regiunel
Ün proget da la Repower prevezza l’installaziun da baunchins per charger velos electrics e telefonins lung la val, eir in connex cul proget Engadin Arena. Il cussagl decida da vulair perseguiter il proget e definescha ils lös Plaz e Resgia scu puncts optimels per l’installaziun d’ün tel baunchin.

Infurmaziuns our da tschantedas da cumischiuns

Societed da tir sportiv Zuoz: il president ho partecipo a la radunanza generela da quista nouva societed unida (300m + 25/50 m) a Zuoz. Las vschinaunchas da la Plaiv haun signaliso lur prontezza da surpiglier ils cuosts dal chesin da tir i’l ram scu preschanto.

Mia Engiadina: A vain drizzo aint ün uschedit „Helpdesk“ in vschinauncha uschè cha persunas interessedas as paun infurmer sül lö sur da la spüerta.

Giubileum Lia Rumauntscha: la LR festagia l’an chi vain sieu 100evel anniversari. Our da quel motiv voul l’organisaziun organiser festiviteds culturelas e tschercha ün lö per mner tres quellas. Il cussagl decida d’annunzcher l’interess per gnir a cugnuoscher ils detagls.

Sanaziun Via Ritscha: in connex culla sanaziun da la Via Ritscha s’ho constato cha l’iglüminaziun publica nu cuntainta e cha füss d’installer üna nouva lampa. La Repower ho eir infurmo cha füss da müder our il cabel da la forz’electrica per eviter cha la via stu gnir avierta darcho in duos ans. Our da quists motivs decida il cussagl da deliberer ün credit da frs. 15‘000.00 per installer ün nouv cabel e monter üna nouva lampa.

Zuoz, 4 meg 2018/cd

inavous