arcumander quista paginaemailFacebookTwitter

Decisiuns dal cussagl cumünel december 2017

In occasiun da sia tschanteda dals 6 december 2017 ho il cussagl cumünel da Zuoz traunter oter decis il seguaint:

A las seguaintas dumandas da fabrica ho il cussagl aderieu e relascho ils permiss:

Fabricas

  • Perla Wäscherei, San Murezzan/Zuoz: per l’installaziun d’ün tanc da gas liquid, Curtinellas
  • Giovanna Geer Brunies, Zuoz: per l’ingrandimaint da la stalla, Dorta
  • Joos Margadant, Zuoz: per la construcziun d’üna lucarna e fnestra da tet, chesa nr. 193 in Dimvih d’Aguêl
  • Dmura AG, Zuoz: per l’ingrandimaint dal Hotel Engiadina
    Vschinauncha da Zuoz: sananziun dal stand da tir in Suotarivas ed installaziun da nouv tschüffaballas


Definiziun da funcziun da controlla e coordinaziun progets da construcziun bassa in vschinauncha
La cumischiun da fabrica fo la proposta da surder a sar Gudench Mischol scu mneder tecnic da la vschinauncha la cumpetenza da controller e coordiner progets da construcziun bassa chi vegnan realisos sül territori da Zuoz da divers impressaris e partenaris, scu p.ex. la Repower, la Swisscom u Simon Salzgeber cun sieu lingia da s-chodamaint a dis-tanza. Per eviter discapits scu quista sted vain il mneder tecnic infurmo da l‘uffizi da fabrica sur dals progets per ch’el possa tgnair in ögl il svilup ed inua necessari intervgnir.

Infurmaziuns our da las tschantedas da cumischiuns
Proget „Art in vaider a Zuoz“: sar Ulrich Wismer, chi ho già contribuieu fermamaing vi da la realisaziun da las ouvras da Gian Casty i’l tunnel dal parkegi, ho preschanto ün nouv proget. El voul publicher ün pitschen cudesch inua ch’el preschainta tuot ils s-chazzis d’art in vaider chi’s rechattan a Zuoz. Tenor el sun que ouvras importantas e la GSK (Gesellschaft für Schweiz. Kunstgeschichte) es pronta da publicher quista lavur suot lur tet. Scu partenaris prevezza sar Wismer la vschinauncha, las duos baselgias ed il Lyceum. A sun previs 3‘000 publicaziuns cun ün cuost totel da ca. frs. 50‘000.00. Sar Wismer dumanda d’üna vart ün tschert agüd finanziel e da l’otra vart ün tschert agüd organisatoric da la vschinauncha. Siand cha art es ün tema defino aint il plan directiv turistic ed in saviand che valur cha quista sort d’art ho per la vschinauncha, es il cussagl perinclet da sustgnair a sar Wismer in quist proget.

Varia
Las prouvas d’ova potabla demuossan üna buna qualited. La Viafier Retica ho do l’acconsentimaint per monter üna tevla da signalisaziun pel parkegi Centrel vi da la punt dal tren. Impü vegnan montos muossavias pü grands süllas cru-schedas per signaliser meglder il parkegi.

Zuoz, ils 3 schner 2018/cd

inavous