arcumander quista paginaemailFacebookTwitter

Decisiuns dal cussagl cumünel marz 2018

In occasiun da sias tschantedas düraunt il mais da marz 2018 ho il cussagl cumünel da Zuoz traunter oter decis il seguaint:

Fabricas
A las seguaintas dumandas da fabrica ho il cussagl aderieu e relascho ils permiss:

  • Dmura AG, Zuoz: per la sanaziun da la Chesa Bellaria, Chöntschet
  • Quality of life Ltd Zuoz/MDS Architektur San Murezzan: per la prolungiaziun dal permiss da fabrica proget der ün hotel, Chaunt da Crusch

Revisiun parziela planisaziun dal lö edifizis d’agricultura
La cumischiun da planisaziun ho invio üna revisiun parziela da la planisaziun dal lö in connex cun üna nouva zona per edifizis agriculs in Curtin Plavaunt. La basa da quista procedura es il stüdi dal architect Sauter. Il cussagl repassa la documainta cumplessiva in detagl e constata cha que’s tratta d’ün proget pretensius, in quel chi sun gnieu definos divers lös per insomma pudair construir edifizis agriculs in futur. A segua üna discussiun animeda sur dals lös existents in Vuorcha. Il cussagl decida da vulair invier la procedura e da trametter la documainta als uffizis per üna pre-examinaziun.

Avertüra rait fibra optica, fasa 2
Il cussagl vain oriento sur da la situaziun actuela da l’avertüra da la rait da fibra optica chi’d es gnida fatta düraunt l’an 2017 da la Repower. La fasa 1 es intaunt glivreda. Per la fasa 2 es da calculer cun cuosts da frs. 600‘000.00 per cha tuot la vschinauncha, exclus la zona Surmulins, possa profiter da quista spüerta importanta. Per pudair invier las lavuors da planisaziun ed execuziun decida il cussagl da suottametter a la radunanza cumünela dals 20 gün 2018 üna dumanda da credit ill’otezza da frs. 600‘000.00.

Agir a reguard aboliziun quota per esters

Zieva cha’l cussagl vaiva decis in sia tschanteda dals 1. november 2017 da piglier per mauns la tematica sun gnieus fats divers sclarimaints in chosa. Il cussagl decida da suottametter la proposta d’uzer la quota per esters sün 100% (hoz 30%) a la prosma radunanza cumünela dals 20 gün 2018.

Cussagl cumünel
Tschernas da Chalandamarz

Siand cha tuots duos candidats, nempe sar cusglier Peter Andri Vital e sar cusglier Lucian Schucan, haun ragiunt la magiurited absoluta aint il prüm scrutin es tenor l’uffizi da vschinaunchas e la chanzlia dal stedi dal chantun Grischun da trer la büs-cha. Cun que cha ün oter candidat ho ragiunt dapü vuschs po be ün dals duos cusgliers cuntinuer cun sia plaiv. Sar cusglier Peter Andri Vital declera ch’el as retira our dal motiv ch’el hegia servieu uossa totelmaing 15 ans a la vschinauncha e resta auncha in carica fin als 30 gün 2018. Cun quista decisiun es sar cusglier Lucian Schucan automaticamaing tschernieu scu cusglier cumünel pel prossem trienni.

Finanzas
Rendaquint 2017

Il cussagl repassa il rendaquint 2017 in tuot ils detagls. La revisiun dal rendaquint es gnida fatta dal büro RBT da San Murezzan. Eir la cumischiun sindicatoria ho fingià pudieu piglier invista i’l rendaquint ed ho inoltro lur rapport. Il guadagn, zieva avair fat diversas amortisaziuns extraordinarias considerablas e maximelas süls stabels, importa frs. 5‘863.87. Zieva avair repasso il quint d’investiziuns, il quint curraint e’l bilauntsch in detagl e zieva avair clappo las spiegaziuns vulidas deliberescha il cussagl il rendaquint 2017 a maun da la prosma radunanza cumünela.

Provedimaint d'ova
Imsüras a reguard dans vi da las lingias d’ova

La lingia d’ova traunter la Chesa Badile e la zona Chastlatsch muossa sü ün dan. In connex culla sanaziun da la lingia in Curtin Plavaunt (1. etappa) d’eira gnida fatta üna vasca granda. Siand cha la lingia es lungia 170 meters es da spetter giò la prümavaira per la avrir e valüter la situaziun in detagl. Intaunt nun es da fer prescha perche cha la lingia es gnida serreda giò.

Affers da sandet
Cunvegna da prestaziun provedimaint da sandet Engiadin’Ota

Il cussagl repassa la missiva dals statüts per la votumaziun dal pövel dals 10 gün 2018 scu eir la cunvegna da prestaziun chi stu alura gnir suottamissa a la radunanza cumünela. La nouv’organisaziun aintra alura in vigur retrospectivmaing süls 1. schner 2018. Ils cuosts da frs. 1,634 milliuns vegnan scumpartieus süllas vschinaunchas da l’Engiadin’Ota tenor clev da scumpartimaint e la cunvegna da prestaziun traunter las vschinaunchas vain stipuleda cun üna düreda da quatter ans. Il cussagl es perinclet cul cuntgnieu da la documainta e cul agir e decida da suottametter la cunvegna da prestaziun a la radunanza dals 20 gün 2018, suot la premissa cha’ls statüts vegnan acceptos dal pövel.

Vias, punts ed ovas
Aboliziun parkegis suot la Chesa Magni

Il cussagl decida d‘abolir ils duos parkegis laterels suot la Chesa Magni lung la Via Dimvih d’Aguêl. Per eviter cha vain parco vegnan elavuredas imsüras.

Commerzi e misteraunza, turissem
Imsüras post d’infurmaziun a reguard integraziun da la Posta

Per pudair integrer l’agentura da la posta ill’infurmaziun turistica in staziun es da piglier tschertas imsüras per optimer l’infrastructura. Per ingrandir il spazi es da strer our ün mür e spuster tel inavous, uschè cha’ls cliaints da la posta paun evader lur affers cun üna tscherta discreziun. Il cussagl decida da deliberer l‘import bsögnaivel per cha las lavuors paun gnir fattas düraunt la seguonda mited d’avrigl. La posta serra sias portas la fin da meg e l’agentura nouva evra sias portas ils 4 gün 2018.

Educaziun e cultura
Ulteriur agir organisaziun biblioteca

Duonna Severine Niederer ho do desditta sülla fin d’avrigl. In quist’occasiun es gnida fatta üna valütaziun da las frequenzas da visitaduors chi demuossa cleramaing cha l’ura da las 18:00 a las 19:00 vain frequenteda fich poch. Our da quel motiv decida il cussagl da tegner aviert la biblioteca be pü da las 15:00 fin las 18:00, ma inavaunt mincha di da l’eivna traunter lündeschdi e venderdi. Düraunt las vacanzas da meg resta la biblioteca serreda. Duonna Paola Morellini es pronta da surpiglier ün terz mez di. Per ils oters duos mezs dis vegnan impieghedas ad uras las duonnas Loredana Willy ed Antoinette Russi, chi haun tuottas duos la scolaziun da bibliotecaras.

Tscherna d’üna mussedra per la scoulina

Il cussagl da scoula ho valüto in detagl la situaziun a reguard las mussedras da la scoulina. Zieva la tscherna d’üna nouva mussedra cun ün pensum da 100% stu uossa gnir cumpletteda la squedra. Our da quels motivs propuona il cussagl da scoula la tscherna da duonna Carole Ringger da Zuoz, cun ün pensum da ca. 30% e limito sün trais ans. Per cumpletter eir il venderdi bunura güda oura duonna Claudia Caprez cun ün permiss speciel per l’an scolastic 2018/2019.

Decisiun a reguard statüts scoula Plaiv SFM

Il cussagl repassa ils statüts elavuros dal cussagl da scoula, dals delegios e dals presidents cumünels da la Plaiv. A vegnan fattas diversas correcturas zieva avair discuto artichel per artichel. Ils delegios da las singulas vschinaunchas fuorman nouv il cussagl da scoula. Zieva avair repasso ils statüts e zieva cha’l cussagl es perinclet cul cuntgnieu da tels ed eir cul agir, vegnan ils statüts suottamiss a l’uffizi da vschinaunchas dal chantun Grischun per üna pre-examinaziun.

Infurmaziuns our da tschantedas da cumischiuns
Concours Hippique Zuoz: per quist evenimaint es da piglier in vista las seguaintas imsüras: 1. Schlarger la via d’access sülla pista d’Inline e vers la sela per ün meter per pussibiliter cha autos paun cruscher meglder. 2. Amegldrer il provedimaint d’ova potabla per las tendas dals chavals e las tualettas. 3. Chatter ün lö per deponer las mattas da gomma per la plazza da sablun. Supralös e sclarimaints detaglios in quist connex seguan in prümavaira.

Scoula primara: il magister Corsin Näff ho do desditta per la fin da quist an scolastic. La plazza vain dalum publicheda scu üsito.

Zuoz, 9 avrigl 2018/cd

inavous