arcumander quista paginaemailFacebookTwitter

Trattativas dal cussagl cumünel da meg, gün e lügl 2017

In occasiun da sias tschantedas düraunt ils mais da meg, gün e lügl 2017 ho il cussagl cumünel da Zuoz traunter oter decis il seguaint:

Fabricas

  • Karin ed Andri Casty, Zuoz: per la construcziun d’üna chesa per üna famiglia cun indrizs solars, Ritscha
  • Ertevels Otto Sonder, Zuoz: per la sanaziun da la chesa nr. 81 in Chanels
  • Alexandra Könz, Lugano: per l’installaziun da pumpas da chalur, Chesa Mariöl 4
  • Romito AG, Zuoz: per la demontascha temporara dal idrant davaunt la Chesa Gregori
  • WALO AG, Samedan: per ün plazzel da deponia da materiel da fabrica sül parkegi Chastlatsch
  • Roth Gerüste AG, La Punt: per la construcziun d’üna sela ed ufficina cun uffizis ed abitaziuns in Curtinellas
  • Famiglia Hohl-Casty, Zuoz: per la construcziun d’üna garascha suotterrauna cun access illa chesa nr. 70 in Dorta
  • Simon Salzgeber, S-chanf: per la construcziun d’üna lingia da chalur a distanza, Lyceum fin Mariöl
  • Roman Grossrieder e Mena Bisaz Grossrieder, Zuoz: per la construcziun d’üna chesa per üna famiglia cun abitaziun integreda, Via Nouva
  • Carlos Izkander Cardoso Vigueros e Cinthya Jeanette Salgado Alpizar, Zuoz: per la construcziun d’üna chesa per üna famiglia cun abitaziun integreda, Mariöl
  • David e Barbara Jenny, Zuoz: per la sanaziun da la fatscheda e per ün nouv chamin da la Chesa Suotaquadottas, Surmulins
  • Oliver Arquint, Bern: per la sanaziun da la Chesa Chavazzaglias e demoliziun dal bagn aviert
  • Dmura AG: ingrandimaint Hotel Engiadina, arretaziun dal s-chev, Chöntschet
  • BG Godin, Zuoz: per la montascha d’üna tevla da reclama

Chesa da parkegi Centrel
Cunvegna cul Museum Romont a reguard ouvras Gian Casty

Traunter il Vitro Musée Romont e la vschinauncha da Zuoz es gnida stipuleda üna cunvegna in connex cul imprast da las tschinch ouvras da Gian Casty chi sun gnidas installedas aint il tunnel dal parkegi Centrel. L’imprast vain defino per 10 ans cull’intenziun da prolungiaziun per l’avegnir.

Commerzi e misteraunza, turissem
Ulteriur agir plazza da glatsch Lyceum – Purtum

Il cussagl repassa üna cunvegna prepareda dal Lyceum Alpinum chi descriva la situaziun da partenza in connex cun üna plazza da hockey cumünaivla sül campus dal Lyceum. La contribuziun da la vschinauncha da frs. 250‘000.00 vain integreda aint il preventiv 2018. La cunvegna vain stipuleda per üna düreda da tschinch ans. In quist temp as ho temp per invier la procedura da planisaziun per ün glatsch artificiel a Zuoz, vi da quel chi füss ferm interesso eir il Lyceum. Il glatsch sü Purtum dess gnir fat da la scoula da skis uschè chi resta üna tscherta spüerta e cumplettescha la spüerta per famiglias ed iffaunts. Il proget dess gnir realiso sül cumanzamaint da la stagiun d’inviern 2017/2018 e scha mê pussibel cun ün turnier da hockey per inaugurer la nouva spüerta.

Proget innaivaziun loipa da passlung Zuoz e S-chanf
Quist proget es naschieu in connex cul s-chev chi vain fat fin sü La Punt in connex cullas lingias da fibra optica chi vegnan missas suot terra da la Mia Engiadina. Ils böts sun ils seguaints: 1. pudair innaiver la loipa da passlung traunter il liftin da S-chanf e la Resgia da Zuoz per prolunger la stagiun turistica, 2. spordscher ün sistem da sauaziun dals pros als purs per la sted e 3. optimer il provedimaint d’ova traunter las vschinaunchas chantunaisas. Il proget prevezza üna lungezza da ca. 3 km cun 18 vascas d’ova e cun cuosts cumplessivs da ca. sfr. 2,2 milliuns. La fin d’october as pudess svuler tuot ils chanuns dals lifts in val e naiver duos trais nots per avair pront üna loipa da passlung. Il cumün da S-chanf es eir fermamaing involvo illas discussiuns ed ils cumüns da Madulain e La Punt sun infurmos. Il böt es natürelmaing quel da pudair prolunger ün di la loipa fin La Punt. Ad es avaunt maun ün tschert squitsch da temp siand cha’l s-chev da l’EKW vain fat la sted 2018. Uossa es l’occasiun per fer quist pass, zieva cha’l s-chev es zuglio esa memma tard. Üna premissa importanta es natürelmaing cha’ls partenaris turistics (hotels, scoula da passlung, affers da sport, etc.) collavureschan per cha’l proget possa avair success. Il proget es eir depono tar la sviluppedra regiunela chi guarda scha que do subsidis chantunels u federels per sbasser ils cuosts. Eir la collavuraziun cun S-chanf es fundamentela siand cha S-chanf vess da surpiglier üna part dals cuosts. Per pudair cuntinuer cun las lavuors stu esser tratta üna decisiun fin la fin da gün 2017. Il cussagl cumünel decida da vulair da princip cuntinuer cul proget, suot la cundiziun cha la finanziaziun possa gnir sgüreda.

Collavuraziun regiunela
Cunvegna da prestaziun GIS Engiadin’Ota

La collavuraziun a reguard il sistem d’infurmaziun da datas d’infurmaziun geograficas stu gnir regleda da nouv zieva cha’l Circul vain scholt per la fin da l’an. Our da quel motiv vain preschanto üna nouva cunvegna da prestaziun chi regla ils detagls. Il cussagl repassa la cunvegna pass per pass. Quista ho üna düreda da quatter ans e vo in vigur ils 1. schner 2018. Ils cuosts per la vschinauncha da Zuoz s’amuntan sün ca. frs. 6‘000.00 per an. Il cussagl es perinclet cul cuntgnieu da la cunvegna e cul agir.

Commerzi e misteraunza, turissem
Contrats VR a reguard post d’infurmaziun Zuoz

Zieva divers discuors culs respunsabels da la Viafier Retica sun uossa avaunt maun ils singuls contrats chi reglan la fittaunza da las localiteds scu eir la collavuraziun scu maina-staziun. Il cussagl repassa ils singuls contrats chi aintran in vigur ils 1. schner 2018 e chi haun nouv ün temp da desditta da ses mais. Ils contrats sun gnieus surpiglios ün ad ün da la destinaziun ESTM chi d’eira fin cò il partenari da la VR. Il cussagl es perinclet cul cuntgnieu dals contrats e cul agir.

Vias, punts ed ovas
Decisiun a reguard signalisaziun Via Dimvih d’Aguêl

La communicaziun a reguard la nouva signalisaziun da la Via Dimvih d’Aguêl es gnida publicheda düraunt 30 dis ed a nu sun entros üngüns recuors. Il cussagl decida dimena da metter in vigur la signalisaziun. Eir quista decisiun stu gnir publicheda aunch’üna vouta per 30 dis per cha la signalisaziun aintra definitivmaing in vigur.

Muossavia permiss da circulaziun vias champestras
Il cussagl tratta ün muossavia chi regla l’adöver da permiss per las vias champestras da la vschinauncha. Il muossavia dess güder a l’administraziun in cas da dumandas chi chi survain ün permiss e suot che cundiziuns. Il reglamaint aintra in vigur süls 1. lügl 2017.

Agricultura
Uorden d’alps

La cumischiun da las alps ho elavuro üna proposta per ün nouv uorden d’alps chi’d es gnieu simplificho considerabelmaing. Ils detagls dal uorden dessan gnir reglos in ün reglamaint chi po gnir adatto dal cussagl cumünel tenor bsögn. Il reglamaint pertuchand e las cartas geograficas dessan gnir elavuros d‘utuon zieva l’alpageda. L’uorden dess gnir suottamiss a la prosma radunanza cumünela in november 2017.

Administraziun cumünela
Tscherna d’üna nouva giarsuna

La giarsuna Carmen Priuli ho accumplieu sieu giarsunedi da commerzi cun success ed il cussagl gratulescha per quist pass important. Scu nouva giarsuna tscherna il cussagl a duonna Milena Pavanello da S-chanf, chi cumainza il giarsunedi da trais ans (profil E) ils 1. avuost 2017.

Educaziun e cultura
Tscherna d’ün lavuraint sociel per lavur cun giuvenils

Zieva cha sun entredas trais annunzchas da candidats propuona la cumischiun da lavur sociela in scoula da la Plaiv da tscherner a sar Friedrich „Fredy“ Bär da Silvaplauna, chi ho da sieu temp fabricho sü il lö d’inscunter per giuvenils a San Murezzan. Ad es previs üna stretta collavuraziun traunter il proget da la Plaiv e la spüerta da San Murezzan. La tscherna vain effetueda da la delegeda da la scoula Plaiv SFM, inua cha la plazza vain eir integreda administrativmaing. Respunsabel pel proget dess esser il depüto da la vschinauncha da Zuoz, siand cha’l proget es eir stipulo scu imsüra aint il program d’acziun Zuoz 2020.

Contribuziuns diversas
Sponsoring Maurus Lozza

Il giuven atlet da passlung indigen Maurus Lozza ho gieu üna stagiun grandiusa cun fich buns resultats. Zieva cha la vschinauncha vaiva sustgnieu a Maurus Lozza cun ün sponsoring fo el la dumanda scha quel ingaschamaint pudess gnir prolungio. Il cussagl decida da prolunger il sponsoring per la prosma stagiun 2017/2018. Scu cuntravalur vain il logo e nom da Zuoz integro süllas chapütschas etc. dal giuven atlet.

Infurmaziuns our da tschantedas da cumischiuns
Situaziun posta Zuoz: davart da la posta Svizra es gnieu signaliso cha la posta da Zuoz vain verificheda. Discuors haun lö prosmamaing.

Societed da luotta: il cussagl do il permiss a la societed da luotta da pudair druver la sela Pradels per ün’occurenza da luotta chi ho lö ils 16 settember 2017. 

Organisaziun da vschinauncha
Saramantaziun dal nouv cusglier Lucian Schucan

Illa tschanteda dals 5 lügl 2017 saramantescha il president cumünel il nouv elet cusglier cumünel Lucian Schucan tenor la fuorma indicheda i’l artichel 38 da la constituziun cumünela. Impü vain il nouv cusglier avertieu sül artichel 28 da la constituziun a reguard l’obligaziun da discreziun. Cun que aintra il nouv elet in carica cun tuot ils drets e dovairs da sieu uffizi.

Spartiziun dals decasteris / nouva constituziun dal cussagl
Illa tschanteda dals 5 lügl 2017 sun gnieus scumpartieus ils decasteris scu segua:

President cumünel, administraziun
Flurin Wieser, vice-president Ramun Ratti

Finanzas e provedimaint sociel
Peter Andri Vital, suppleant Flurin Wieser

Scoulas e cultura
Romeo Cusini, suppleant Peter Andri Vital

Turissem
Ramun Ratti, suppleant Lucian Schucan

Fabricas, planisaziun
Christian Florin, suppleant Romeo Cusini

Pulizia, agricultura, alps e gods
Flurin Wieser, suppleant Gian Rudolf Caprez

Vias e trafic
Lucian Schucan, suppleant Ramun Ratti

Provedimaint d’ova, chanalisaziun, pumpiers, iglüminaziun ed immundizchas
Gian Rudolf Caprez, suppleant Christian Florin

Varia, orientaziuns, invids e Termins
Las prouvas d’ova demuossan scu üsito üna qualited optimela.

Zuoz, ils 27 lügl 2017/cd

inavous