arcumander quista paginaemailFacebookTwitter

Trattativas dal cussagl cumünel avuost 2017

In occasiun da sias tschantedas düraunt il mais d‘avuost 2017 ho il cussagl cumünel da Zuoz traunter oter decis il seguaint:

Fabricas
A las seguaintas dumandas da fabrica ho il cussagl aderieu e relascho ils permiss:

 

  • Perla Wäscherei, San Murezzan: per l’ingrandimaint da la chesa da misteraunza Curtinellas
  • Kaffee Badilatti + Co. SA, Zuoz: per l‘ingrandimaint da las garaschas existentas e dal magazin existent
  • Carlo Camponovo, Soregno: per adaptamaints interns vi da la Chesa Zorro, Chaunt da Crusch
  • Romito AG, Segl-Maria: per adaptamaints vi dal proget existent a reguard parkegis, cligna e fatscheda da la Chesa Gregori in San Bastiaun
  • BG Curtin, Zuoz: per divers müdamaints vi dal proget originel, chesa nr. 3 in Curtin Plavaunt
  • BG Godin, Zuoz: per müdamaints vi dal proget originel, chesa B in Crasta
  • Cla Rauch, Zuoz: per la sanaziun da la pratcha da meidi, Chesa Crasta
  • Famiglia Carlos Cardoso, Zuoz: per l’installaziun da pumpas da chalur cun sondas, Mariöl
  • Fundaziun Walter A. Bechtler: orientaziun a reguard nouva pusiziun da la sculptura d’art da Kippenberger, Curtinatscha

Pulizia
Cunvegna cumischiun da lavinas Zuoz-Madulain
Il cussagl tratta la proposta per üna cunvegna elavureda da sar Martin Kaiser dal uffizi da god e da prievel da natüra chi regla la collavuraziun da las duos vschinaunchas a reguard la cumischiun da lavinas. Il cussagl repassa la cunvegna punct per punct ed es perinclet cul cuntgnieu e cul agir.

Decisiun a reguard nouvas tariffas da parkegi
Sülla publicaziun a reguard las nouvas tariffas da parkegi nu sun entros üngüns recuors uschè cha la decisiun definitiva dal cussagl po gnir publicheda i’l fögl ufficiel chantunel per 30 dis. Zieva quist temp aintran las tariffas in vigur.

Agricultura
Reglamaint adöver chamannas ed alps
La cumischiun da las alps ho elavuro ün sböz per ün nouv reglamaint per regler l’adöver da las chamannas ed alps chi nu vegnan (pü) druvedas per l’alpageda. Il cussagl fo pitschens adaptamaints e decida da metter in vigur quist reglamaint a partir da dalum. Inavaunt repassa il cussagl il sböz per ün contrat da fittaunza d’ün tel oget. Eir quist vain chatto per bun uschè cha’ls contrats existents dessan gnir adattos ed ils nouvs gnir stipulos tenor quist exaimpel.

Silvicultura
Praisa da pusiziun „Waldentwicklungsplan 2018+“
Sar Gian Cla Feuerstein, il respunsabel da l’uffizi da god e prievel da natüra per nossa regiun, declera il nouv plan da svilup per la regiun dal süd cun ün riassunt generel ed in muossand via süls detagls chi pertuochan la vschinauncha da Zuoz. Üna vouta accepto da la Regenza dvainta il plan impegnativ per las vschinaunchas. A vegnan trattos set temas differents. La situaziun da Zuoz es in generel fich positiva ed impustüt ils gods pasculos haun üna grand’importanza per la bio-diversited. In divers gods as ho stuvieu constater dans tres sulvaschina e tar las vias da god e dad alp es da remarcher cha la via sün Arpiglia es pütöst stretta, ma es registreda scu proget scha eir cun pitschna priorited. A reguard la s-chaffida d’ün reservat per urogals decida il cussagl da na inoltrer üna proposta, siand cha que pudess der memma restricziuns üna vouta cha’l reservat es stipulo. A reguard la praisa da pusiziun dal plan da svilup dal god 2018+ decida il cussagl unanimamaing da fer adöver da la pussibilited e da comunicher ch‘üna zona potenziela da reservat da natüra nu fatscha dabsögn, siand ch‘üna tela exista fingià cul God Giavagl. Uschè cha que nu drouva dimena dapü reservats chi restraindschan l’adöver dal god.

Commerzi e misteraunza, turissem
Infurmaziun proget regiunel Engadin Arena
Il cussagl vain infurmo sur dal concept Engadin Arena chi prevezza la cumpilaziun da la spüerta per sports da perseveranza in Engiadin’Ota. Il proget as basescha sülla nouva strategia dal Engadin Skimarathon e vain resguardo scu fich important pel svilup turistic da la regiun. Il punct centrel sun las infrastructuras sportivas e turisticas chi sun avaunt maun illas vschinaunchas. A dessan gnir s-chaffieus differents Hubs (centers), traunter oter eir a Zuoz illa Resgia inua cha las premissas sun perfettas. Ils cuosts per l’elavuraziun dal proget düraunt l’an 2018 importan frs. 200‘000.00, da quist import vess Zuoz da surpiglier ca. frs. 13‘000.00 tenor scumpart regiunel. Il cussagl cumpiglia il questiunari ed as declera perinclet da sustgnair e perseguiter il proget, chi dess gnir mno suot la bachetta dal Engadin Skimarathon.

Contrats cun ESTM AG a reguard post d’infurmaziun Zuoz
Il cussagl tratta ils contrats chi descrivan la collavuraziun a partir dals 1. schner 2018 traunter la nouva ESTM AG e la vschinauncha da Zuoz a reguard il post d’infurmaziun illa staziun da Zuoz. Ils contrats vegnan stipulos per duos ans e düran fin als 30 november 2019. Intaunt elavurescha la destinaziun ün concept numno „Infostellen 2020“ chi descriva ils posts d’infurmaziun in futur. Siand cha’l giavüsch da lascher serrò las dumengias nu porta ad üna diminuziun dals cuosts decida il cussagl da lascher aviert düraunt la stagiun ota scu fin cò. Il cussagl discuta eir ils uraris d’avertüra in generel e giavüscha cha’l post d’infurmaziun resta aviert sur mezdi, ma evra per la peja pür las 09:00 la bunura.

Mia Engiadina – Repower: decisiun a reguard agir
Ad haun gieu lö diversas tschantedas impegnativas per cha quist proget piglia plaunet fuorma. Intaunt sun avaunt maun eir ils prodots da la Mia Engiadina (internet, televisiun e telefon) chi sun fich attractivs ed eir pü favuraivels scu quels da la Swisscom. La dumanda es uossa scu agir cul attach da las singulas chesas. Il cussagl decida cha la vschinauncha dess surpiglier ün import maximel da frs. 3‘000.00 vi dals cuosts per l’attach fin sül cunfin da la parcella, analog l’attach da l’ova e da chanalisaziun. Quist dess valair scu spüerta da basa per tuot ils possessuors chi vöglian tacher lur chesa vi da la rait da fibra optica. Ad es previs cha’ls prüms attachs vaun in funcziun in settember 2017. Impü dessan eir gnir montos duos emettuors da WLAN sün Plaz ed in Staziun.

Dumandas da sustegn finanziel
Il CSI da San Murezzan ho fat üna dumanda da sustegn a las vschinaunchas da la Plaiv. Da l‘import surpiglia Zuoz la mited scha las otras vschinaunchas sun perinclettas.

Infurmaziuns our da tschantedas da cumischiuns
Proget lavur cun giuvenils: la cumischiun ho pudieu suottascriver il contrat da lavur cun sar Fredy Bär, chi elavurescha uossa ün concept detaglio per invier il proget per ün lö d’inscunter per giuvenils da tuot la Plaiv. Scu lö d’inscunter vain defino la defaisa civila Purtum (Bunker) inua cha’s rechattaiva la gardaroba dal club da hockey, invezza dals containers movibels. Ils containers dessan gnir vendieus il pü svelt pussibel.

Posta Zuoz: ad ho gieu lö ün inscunter culs respunsabels da la Posta. Il böt es da pudair integrer la posta aint ill’infurmaziun turistica/staziun süls 1. schner 2018 scha mê pussibel.

Festa d’alp: la festa d’alp sü Funtauna d’eira ün grand success adonta cha’s ho stuvieu anteciper il program per ün di. Ils bgers ingrazchamaints da giasts ed indigens demuossan cha que es ün evenimaint important chi dess gnir organiso eir in avegnir.

Alp Es-cha Dadoura: tar quist proget es gnieu cumanzo cullas lavuors. Las maschinas da la chascharia da Laviruns vegnan pigliedas oura la mited da settember per fer üna revisiun e zieva monter aint il nouv edifizi.

Concours Zuoz: il Concours 2017 d’eira ün grand success cun sur 1‘500 starts e bgers spectatuors. Ils cuosts per la plazza da sablun s’amuntan a frs. 50‘000.00 adonta diversas contribuziuns da sponsuors (Montebello, Rocca+Hotz, WALO, Salzgeber). Ad es da ponderer scha nu’s voul cumprer las mattas da gomma invezza da las fitter minch’an per bgers raps. L’access sur la via dad inline stu gnir optimo siand cha’s es rivo al cunfin da capaciteds. Eir la furniziun dad ova per las stallas stu gnir optimeda. A reguard il furnimaint da forz’electrica decida il cussagl unanimamaing da cumprer ün generatur da la vschinauncha da Zernez. As po però constater cun grand plaschair cha’ls sforzs portan früts e cha’l Concours es (darcho) dvanto l’evenimaint principel da la stagiun da sted.

Via d’Albanas: La sanaziun da la via chi maina sü tals repars es part dal proget cumplessiv. La gruppa tecnica prepara la via fin inua pussibel auncha quist utuon. Da prümavaira vegnan alura continuedas las lavuors cun maschinas grandas.

Cumischiun da turissem: ad ho gieu lö üna saireda d’infurmaziun chi’d es gnida organiseda insembel culla societed da misteraunza da la Plaiv. A d’eiran preschaintas ca. 30 persunas chi sun gnidas orientedas sur dals progets turistics chi sun pel mumaint actuels.

Zuoz, ils 6 settember 2017/cd

inavous