arcumander quista paginaemailFacebookTwitter

Trattativas dal cussagl cumünel dal mais marz 2017

In occasiun da sias tschantedas düraunt il mais da marz 2017 ho il cussagl cumünel da Zuoz traunter oter decis il seguaint:

Fabricas

  • BG Curtin, Zuoz: construcziun d’üna chesa cun püssas abitaziuns, permiss excepziunel a reguard cumanzamaint da fabrica e per l’installaziun da pumpas da chalur cun sondas, Curtin Plavaunt
  • BG Godin, Zuoz: prüms müdamaints da proget chesa A cun garascha e per l’installaziun da pumpas da chalur cun sondas, Davous Crasta 

 
Parkegi Centrel
Las lavuors vaun tenor plans. Lung la via Mareg vain construieu ün marchapè per amegldrer la sgürezza dals pedunzs. La proposta a reguard la signalisaziun pel trafic motoriso es gnida verificheda cun la pulizia chantunela. Ils signels chi mainan il trafic süls parkegis da Plagnoula/Via Nouva vegnan alluntanos per diminuir il trafic suravi Plaz.

Rendaquint 2016
La revisiun dal rendaquint es gnida fatta dal büro RBT da San Murezzan. Eir la cumischiun sindicatoria ho fingià pudieu piglier invista i’l rendaquint ed ho inoltro lur rapport. Il guadagn, zieva avair fat diversas amortisaziuns extraordinarias considerablas, importa frs. 39‘489.43. Zieva avair repasso il quint d’investiziuns, il quint curraint e’l bilauntsch e zieva avair clappo las spiegaziuns vulidas deliberescha il cussagl il rendaquint 2016 a maun da la prosma radunanza cumünela.

Recuors taxas da turissem 2017
Sün bod 800 quints chi sun gnieus tramiss per la taxa da turissem per l’an 2017 sun entros quatter recuors. Il cussagl ho tratto mincha singul recuors e decis da sbütter trais our da motivs da pregüdizi. Ad ün recuors vain aderieu parcielmaing.

Tscherna magistraglia scoula primara Zuoz-Madulain
Il cussagl da scoula ho chatto duos candidats per las plazzas libras illa scoula primara da Zuoz e Madulain. Per la plazza da 100% propuona il cussagl da scoula da tscherner a sar Corsin Näff da Ramosch e per la plazza da 50% (cun opziun fin 80%) propuona el da tscherner a duonna Claudia Bezzola da Zernez, e que limito per l’an scolastic 2017/2018. Il cussagl es perinclet cullas propostas e tscherna ils duos magisters sün cumanzamaint dal prossem an scolastic.

Ulteriur agir proget Mia Engiadina
Las offertas concretas da las firmas Innoveritas e Repower per la prüma fasa da favrer fin gün 2017 sun entredas e prevezzan cuosts cumplessivs da ca. frs. 65‘000.00. Ils cuosts sun integros aint il preventiv 2017. Que as tratta da lavuors preparatoricas per eruir la situaziun da chesa per chesa e sclarimaints tecnics scu river cul fil da fibra da vaider in vicinanza da las spartiziuns.

Proget Promulins Samedan: cunvegna traunter las vschinaunchas „suot“ e „sura“
Il cussagl discuta il stedi actuel da las trattativas fich intensivas traunter las vschinaunchas suot e sura. Las vschinaunchas sura vöglian realiser lur proget Du Lac a San Murezzan. Quel di cha que vain concret stöglian las vschinaunchas suot surpiglier Promulins e pajer our las vschinaunchas sura. Il punct da discussiun d’eira per che predsch cha que dess capiter. Ils presidents cumünels s’haun abinos sün üna valur da la parcella inclus ils edifizis da frs. 1‘519‘000.00. La partecipaziun da las vschinaunchas sura importa frs. 713‘930.00 (47%) seguond la clev da la regiun. Quist import stu gnir pajo oura a las vschinaunchas sura quel di cha’l proget Du Lac vain realiso. L‘agir es defino in üna cunvegna. Il cussagl repassa quista cunvegna in detagl ed es perinclet cul cuntgnieu e cul agir. La cunvegna vain suottamissa a la prosma radunanza cumünela.

Decisiun a reguard programs d’informatica
Il preventiv 2018 stu gnir fat seguond il model HRM2 e pervi da que es uossa il dret mumaint per trer üna decisiun a reguard ils programs. Insembel cul contabel e cul chanzlist e la contabla da S-chanf as ho evaluo trais offerents. In vista ad üna collavuraziun pü stretta eir traunter las administraziuns da Zuoz e da S-chanf ed il fat cha’ls programs existents da la firma RUF cuntaintan decida il cussagl da tscherner la varianta RUF e deliberescha l’import bsögnaivel per fer las investiziuns necessarias. Quistas sun eir previsas aint il preventiv 2017.

Dumandas da sustegn finanziel
L’Open Air da Chapella e‘l museum dal Olympia Bob Run a Schlarigna vegnan sustgnieus cun ün import finanziel. Eir a la dumanda da Sinfonia Engiadina pel concert chi ho lö ill’Aula dal Lyceum la saira dals 29 december 2017 vain aderieu siand cha l’import es previs aint il preventiv 2017.

Infurmaziuns our da tschantedas da cumischiuns
Trenin da Varusch: il trenin vain quista sted ses voutas al di fin a Zuoz. A reguard la finanziaziun as ho pudieu elavurer üna soluziun chi redüa ils cuosts infra ils prossems quatter ans. Il cussagl deliberescha quist import scu credit da cussagl e decida d‘integrer ils cuosts pels prossems trais ans per quist proget turistic fich interessant ed attractiv i‘l preventiv.

Proget glatsch Lyceum: culs respunsabels as es in trattativas per chatter üna soluziun per spuster la plazza da hockey da Purtum our il Lyceum.

L’uster da la bar Tuor clappa il permiss da pudair gestir tela eir düraunt la stagiun da sted, adüna in venderdi e sanda saira.

Zuoz, ils 10 avrigl 2017/cd

inavous