arcumander quista paginaemailFacebookTwitter

Trattativas dal cussagl cumünel settember ed october 2017

In occasiun da sias tschantedas düraunt ils mais settember ed avuost 2017 ho il cussagl cumünel da Zuoz traunter oter decis il seguaint:

Fabricas
A las seguaintas dumandas da fabrica ho il cussagl aderieu e relascho ils permiss:

  • Thomas e Beatrice Stiefel, Turich: per üna sanaziun interna, construcziun remisa per autos e terrassa d’üert, Chesa Cruschetta in Surmulins
  • Johannes Cordett, Zuoz: per la transfurmaziun da l’ufficina existenta in ün’abitaziun primaria, Chesa Cordett in San Bastiaun
  • Romito AG, Chesa Gregori, Zuoz: per l’installaziun d’ün s-chodamaint aint ils chanels da tet, Chesa Gregori
  • Giovanna Brunies Geer, Zuoz: ingrandimaint e sanaziun da la stalla existenta, Dorta, deliberaziun da la dumanda BAB a maun dals uffizis chantunels
  • Vschinauncha da Zuoz: sanaziun dal stand da tir ed installaziun d’ün nouv sistem da tschüffaballas, Suotarivas, deliberaziun da la dumanda BAB a maun dals uffizis chantunels
  • Societed La Diagonela Zuoz: dumanda per la montascha d’üna reclama vi da la chesina dal Golf, Resgia

Agricultura
Contrats da fittaunza per las alps Belvair/Es-cha e Timun
Il cussagl discuta l’agir per scriver our las duos alps. Ün punct es quel scha tar l’alp Es-cha Dadains dess gnir scrit our be la stalla u eir la part abitabla e tenor che argumaints cha interessents paun gnir resguardos scu indigens u na. Impü discuta il cussagl scu cha’s po calculer ils fits pels pasculs, pels edifizis e per la chascharia in möd separo. Eir l’adöver turistic da la tegia e chascharia dess gnir formulo aint il contrat da fittaunza. A reguard il pascul sün Albanas decida il cussagl cha tel stu gnir miss in saiv per eviter dans vi da las scarpadas nouvas chi vegnan fattas in connex culla sanaziun da la via sü tals repars. Las saivs moviblas stöglian gnir installedas ed alluntanedas dal fittadin. Il plan pertuchand fuorma üna part integrela dal contrat da fittaunza.

Finanzas
Dumandas da sustegn finanziel
Las vschinaunchas da la regiun Malögia haun decis da sustgnair la vschinauncha da Bregaglia in connex cullas boudas da Bondo cun ün sustegn finanziel. Il cussagl decida da contribuir ün import da frs. 10‘000.00 scu agüd immediat.

Commerzi e misteraunza, turissem
Dumanda da princip baunchins individuels
Ad aintran adüna darcho dumandas da privats chi vöglian lascher fer baunchins individuels in lain cun inscripziuns scu algordanza per confamiliers etc. Per cha que nu detta ün battibuogl da baunchins decida il cussagl da relascher ün reglamaint chi vain publicho sülla pagina d’internet.

Affers da sandet
Cunvegna da prestaziun ospidel Engiadin’Ota
Zieva cha la radunanza cumünela ho già fat bun varsaquauntas cunvegnas da prestaziun in connex cun organisaziuns regiunelas es intaunt eir pronta la cunvegna chi regla l’andamaint traunter las vschinaunchas da l’Engiadin’Ota e la fundaziun da provedimaint da sandet Engiadin’Ota. Zieva cuorta discussiun decida il cussagl da suottametter eir quista cunvegna a la prosma radunanza cumünela.

Commerzi e misteraunza, turissem
Innaivaziun loipa da passlung – futur agir
Il proget uriund prevezza cuosts da ca. frs. 1,7 milliuns aunz contribuziuns e subvenziuns. Eir la vschinauncha da S-chanf as partecipess vi dals cuosts. Intaunt as ho elavuro üna varianta nouva chi prevezza da bainschi nüzzager il s-chev da las ouvras electricas düraunt la sted 2018 e d’installer üna lingia d’ova d’ota pressiun, ma da spetter giò cull’installaziun d’indriz tecnics per innaiver. La lingia d‘ova serva d’üna vart ad üna futura innaivaziun ma eir scu lingia d’ova d’emergenza traunter las duos vschinaunchas. Il cussagl decida da perseguiter il proget.

Infurmaziuns our da tschantedas da cumischiuns
Revisiun parziela charta da prievels: ün privat ho lascho fer ün cunter-stüdi da la nouva charta da prievels ed ho clappo radschun. Suot quista glüsch decida il cussagl cha eir la vschinauncha lascha examiner la nouva charta dal indschegner chi ho fat il cunter-stüdi per guarder scha’ls nouvs cunfins in Paun Chod ed impustüt sü Purtum sun corrects.

Planisaziun glatsch artificiel: la cumischiun da planisaziun ho discuto la tematica ed es riveda a la conclusiun cha üna tela planisaziun fo part dal proget dal plan directiv da planisaziun e dess gnir elavureda in quella procedura.

Cumischiun da turissem: il proget nouv „Kinderland Purtum“ da la scoula da skis es sün buna via. A reguard il bus local es la cumischiun da l’avis da na abolir la lingia 2. Siand cha’ls parkegis sün Albanas nun existan pü es però da fer ponderaziuns sur dal traget e‘ls uraris dals bus.

Situaziun posta Zuoz: ad ho gieu ün supralö culs respunsabels da la posta per integrer la posta da Zuoz ill’infurmaziun turistica illa staziun. Il proget es sün buna via ed ad es da fer quint cha’l pudaro gnir realiso zieva la prosma stagiun d’inviern.

Varia
I‘l ram dal proget Zuoz 2020 vain spüert eir quist utuon ün nouv cuors da Rumauntsch. Eir il tavulin suot la bachetta da sar Albert Gaudenz ho darcho lö, cumanzand ils 30 october 2017 fin aunz Nadel adüna lündeschdi saira las 18:00 cun ün program vario ed interessant.

Las prouvas da l’ova da baiver cumprouvan üna buna qualited d’ova.

Il proget inscunter per giuvenils ho piglio svung cun 40 annunzchas, que chi’d es ourdvart allegraivel.

Zuoz, ils 7 november 2017/cd

inavous