arcumander quista paginaemailFacebookTwitter

Descripziun

Allegra e bainvgnieu a Zuoz

"Allegra" es ün salüd allegraivel chi vain druvo in tuot l'Engiadin'Ota. Cun tuotta radschun, causa cha sü cò s'ho tuot per esser cuntaint: Üna bella cuntredgia natürela chi's unischa cun üna cultura plaina da vita. Ultra da que pisseran üna granda spüerta ed evenimaints da sport da format mundiel düraunt tuot l'an per üna varieted attractiva chi inchaunta a giasts ed indigens. Immez as rechatta Zuoz, üna da las pü bellas e bain mantgnidas vschinaunchas da l'Engiadina.

Il «Plaz» imposant cun l'ustaria da drettüra Crusch Alva, la baselgia da San Luzi cun sieu clucher marcant, las chesas e la tuor Planta scu eir las otras chesas bain mantgnidas daun a nossa vschinauncha ün’apparentscha grandiusa.
Il «Plaz» imposant cun l'ustaria da drettüra Crusch Alva, la baselgia da San Luzi cun sieu clucher marcant, las chesas e la tuor Planta scu eir las otras chesas bain mantgnidas daun a nossa vschinauncha ün’apparentscha grandiusa.

La vschinauncha da Zuoz es hozindi ün exaimpel prezius d'ün lö rumauntsch chi ho pudieu salver ils testimonis da sieu passo plain evenimaints fin i'l temp d'hozindi. La plazza cumünela imposanta cun l'ustaria da drettüra Crusch Alva, la baselgia San Luzi cul clucher marcant, las chesas Planta e las chesas d'abiter cultivedas daun ün'apparentscha impreschiunanta a quista vschinauncha bain mantgnida in Engiadin'Ota. Il grand numer da chesas nöblas culs tipics balcuns torts engiadinais e’ls ornamaints da sgrafit do in ögl. Eir la chapella romanica tardiva da San Bastiaun e la pitschna chapella gotica Santa Chatrigna imbellischan la vschinauncha.

Cultura e lingua rumauntscha

Rumauntsch es dvanto dal 1938 la quarta lingua ufficiela da la Svizra. Eir scha be ca. 35'000 persunas indicheschan il rumauntsch scu lingua materna, vegnan discurrieus ils tschinch idioms cun superbgia. A Zuoz vain discurrieu puter. Co vegnan ils giasts acumpagnos dapertuot da quista bella lingua e salüdos cun ün amiaivel "Bun di" u "Allegra".

Sport, cultura e temp liber

Il temp nun es sto salda neir illa vschinauncha tradiziunela cun ca. 1300 abitants. A l'incuntrari: Da sted nu vain que mê lungurus grazcha ad üna bella plazza da golf da 18 fouras, üna pista d'inline attractiva, inclus scoula e pussibilited da piglier a fit inline skates, varsaquauntas vias per ir a spass u cul mountainbike. D'inviern fascineschan il territori da skis adatto per famiglias cun üna scoula da skis per iffaunts e scoulina da skis scu eir il center da passlung Sur En e sendas d'inviern idillicas.

Territori da skis da Zuoz adatto per famiglias
Territori da skis da Zuoz adatto per famiglias

Per vita moderna pisseran l'hotel Castell cul hamam e'l restorant Dorta originel. Persunas chi s'interessan per la cultura saron inchantos dal minz dal lö istoric e da las bellas "chesas signurilas". Amihs da la bun'udur dal cafè vegnan a Zuoz dal sgür a l'ur quint tar la pü otsitueda brastularia da cafè da l'Europa ed i'l Caferama Badilatti s'imprenda a cugnuoscher la via dal cafè da la plaunta fin illa tazza. Famiglias as chattan bain causa cha'ls iffaunts haun a disposiziun il pü important in surabundanza: üna natüra plaina da surpraisas e fich intacta. 

Mantegner l'equiliber e proteger l'ierta

L'augmaint dal turissem e'l regress da l'agricultura sun respunsabels pel fat cha Zuoz es dvanto ün lö da vacanzas vers la fin dal 19evel tschientiner. Üna da las lezchas ed obligaziuns las pü importantas da las autoriteds odiernas es quella da mantegner l'equiliber e da proteger l'ierta unica da noss antenats tres ün agir plain respunsabilited e s-chaffind ledschas adattedas.