arcumander quista paginaemailFacebookTwitter

Toponim

La derivanza dal toponim

Zuoz vain manzuno per la prüma vouta in ün documaint dal cumanzamaint dal 9evel tschientiner. I'l urbari dals bains imperiels dal temp da Ludvig il Pietus (temp da regenza 814 fin 840) sun registredas las impostas cha las suostas dal raig da Segl, Zuoz ed Ardez vaivan da pajer. Il nom "Zuoz" dess avair sias rischs i'l pled latin "subtus", rumauntsch "suot" u "sut" (suosta suot in cunguel cun quella sura a Segl). Eir la denominaziun "suosta" chi deriva d'üna risch latina pudess avair gieu influenza sülla furmaziun dal nom. Ad es però eir pussibel cha'l nom as referescha a la nouva vschinauncha chi s'ho furmeda intuorn la baselgia da San Luzi ed intuorn la taverna (hoz Crusch Alva). Oriundamaing as rechattaiva la colonia dal temp da bruonz nempe sül muot Chastlatsch sur l'hotel Castell.

Il nom Zuoz deriva dal latin "subtus"
Il nom Zuoz deriva dal latin "subtus"

Ün'explicaziun pü nouva da Linus Brunner disch cha Zuoz deriva da l'accadic "ZUZU" = "terrain da channa" ("Rohrdickicht"). Fin hoz nu d'eiran ils linguistics buns da classificher precis la lingua retica. A do differentas teorias davart sieu origin e sia appartgnentscha, ma üngüna nun es cumpruveda. L'explicaziun dal toponim Zuoz cha Brunner furnischa as basa sün sia teoria cha'l retic d'eira üna lingua semitica e d'eira il pü dastrusch paraint cul accadic, dimena cul semitic orientel. Quista explicaziun etimologica es dimena ün' explicaziun pussibla dal toponim, chi nun es però cumpruveda.

Veglias schlattas da Zuoz

  • Balastèr
  • Danz
  • Geer
  • Jecklin
  • Juvalta
  • Raschèr
  • Roedel
  • Salis
  • Schech
  • Schucan
  • Travers
  • von Planta
  • Wiezel