Publicho: 9.02.2019

Noviteds dal cussagl cumünel

In occasiun da sias tschantedas düraunt ils mais da december 2018 e schner 2019 ho decis il cussagl cumünel da Zuoz traunter oter il seguaint:

Fabricas: Conjughels Imhof, Oberrohrdorf e Gabriele Berger, Zuoz: access parcella 2242 e mür da sustegn parcellas 2242 e 2503. Conjughels Imhof, Oberrohrdorf: per la construcziun d’üna chesa d’abiter per üna famiglia, parcella 2242 Surmulins. SSZ AG, Zuoz: dumanda BAB dals 3 settember 2018 per müder l’adöver dal chamannin sur dal runel Albanas. SSZ AG, Zuoz: dumanda BAB dals 3 settember 2018 per l’adöver da la staziun sur dal runel Albanas scu remisa per materiel da fabrica. Contrat da dret da fabrica Christian Ferrari: Scu infurmo illa radunanza cumünela dals 28 november 2018 prevezza Christian Ferrari d’ingrandir sieu indriz per laver autos in Resgia. Per que stu la surfatscha da la parcella in dret da fabrica gnir ingrandida. L’ingrandimaint da la surfatscha importa 217 m2. Aint il contrat es stipulo la cundiziun cha Christian Ferrari ho da metter ad ir e mantegner l’üertin aint il chantun da la parcella. Il plan da situaziun fuorma üna part integrela dal contrat chi vain purto aint il cudesch fundiari.

Organisaziun da vschinauncha/Strategia Zuoz 2025: La ditta Quant da Flem ho preschanto ils prüms resultats da lur lavur da retschercha in connex cul questiunari publicho sülla pagina d’internet da la vschinauncha e cun ca. 30 intervistas individuelas. Ad es gnieu valüto il success dal program d’acziun Zuoz 2020 per pudair trer las güstas conclusiuns per la strategia Zuoz 2025. Ils temas inua cha’d es da metter pais eir in avegnir sun clers ed evidaints. Scu prossem pass elavureschan ils cusglieders üna survista pü detaglieda dals champs chi stöglian gnir elavuros in detagl. Il cussagl piglia cugnuschentscha dals resultats preschantos ed es perinclet cul agir a reguard ils prossems pass.

Dumandas da sustegn finanziel/Contribuziun festa 100 ans Lia Rumantscha 2019: La Lia Rumantscha ho fat diversas dumandas da sustegn finanziel a las regiuns in tuot il Chantun, chi’s partecipeschan cun divers imports vi da las festiviteds dal giubileum. Eir la regiun Malögia tratta üna tela dumanda, stu però auncha decider in merit. Zuoz scu lö centrel as partecipescha cun ün import da 15‘000 francs ed üna summa da 10‘000 francs scu prestaziun da la gruppa da lavur.

Dumanda da sustegn finanziel Lyceum Alpinum AG Zuoz: Il Lyceum Alpinum organisescha ün uschedit «Hackathon» la fin da marz 2019, inua cha students e specialists da l’informatica as dedicheschan al tema digitalisaziun in scoula. Pel mumaint ho il Lyceum auncha ün deficit considerabel e dumanda perque a la vschinauncha per ün sustegn finanziel. Il cussagl decida da surpiglier ils cuosts per las pernottaziuns dals partecipants externs.

Turissem - Concept da lös da sport Engiadin’Ota (Sportstättenkonzept): Quist proget es da sieu temp gnieu invio dal sviluppeder regiunel ed es intaunt placho tar la regiun Malögia. Il concept es gnieu elavuro inavaunt ed amplificho culla tematica halla da glatsch regiunela e vain uossa suottamiss als cussagls cumünels per piglier pusiziun. Il cussagl remarcha cha la regiun Plaiv vain suotvalüteda aint il concept e cha que nu’s tratta propcha d’ün concept scu basa pel futur, ma püt.st d’ün inventar da la situaziun actuela in Engiadin’Ota. Il cussagl decida da vulair cumpletter la spüerta da Zuoz e d’agiundscher impustüt il proget da la lingia d’innaivamaint traunter Zuoz e S-chanf. A reguard la valütaziun dals pussibels lös per üna halla da glatsch regiunela nun es il cussagl perinclet culs parameters e pretenda cha vain surpiglio il stedi actuel our da la missiva da la votumaziun dals 10 favrer 2019. Dal rest dal concept piglia il cussagl cugnuschentscha in sen positiv. Ils müdamaints respectivmaing las correcturas vegnan comunichedas a la regiun Malögia.

Educaziun e cultura/Tscherna magister scoula primara: Il cussagl tscherna a Fabio Mehli da La Punt scu nouv magister primar tenor proposta dal cussagl da scoula cun ün pensum da 100 pertschient sül nouv an da scoula 2019/2020. Tscherna d’üna mussedra per la scoulina: Il cussagl tscherna a Fadrina Pünter da San Murezzan scu nouva mussedra per la scoulina tenor proposta dal cussagl da scoula cun ün pensum da 60 fin 80 pertschient sül nouv an da scoula 2019/2020.

Infurmaziuns our da tschantedas da cumischiuns / Regiun Malögia: Il cussagl tratta la dumanda da la vschinauncha da Bever chi prevezza la construcziun d’ün edifizi d’infurmaziun in connex culla renaturisaziun da las agnas. Perque vess üna part da la deponia Sass Grand in Isellas da gnir transmüdeda in üna zona per edifizis publics. Il cussagl es da princip perinclet cul agir, ma suot las cundiziuns cha la capacited da la deponia nu vain redimensiuneda e cha nu do üngün ingaschamaint finanziel davart da la vschinauncha da Zuoz.

Aclas: Ad ho gieu lö ün inscunter cul respunsabel da la chüra da monumaints. A dess gnir elavuro ün muossavia per futurs progets da sanaziun.

Trafic public: La lingia dal bus nr. 7 vain valüteda da nouv. Ad es gnieu surdo l’incumbenza d’elavurer üna proposta per ün bus dal lö sur tuot an in tuot la Plaiv, chi serva impustüt eir a las scoulas.

Cudeschs da Sweelink: Ils cudeschs da Sweelink vessan da gnir digitalisos per avair disponibel las notas e chanzuns in cas da dumandas dad artists. La RISM Swiss es üna ditta specialiseda e füss pronta da fer quista lavur in chesa, uschè cha’ls cudeschs prezius nu bandunan Zuoz. (cd)

Download PDF
Tuot las annunzchas ufficielas
A+
A-