Publicho: 20.08.2019

Noviteds dal cussagl cumünel

In occasiun da sias tschantedas düraunt il mais da lügl 2019 ho il cussagl cumünel da Zuoz traunter oter decis il seguaint:

Cussagl cumünel, spartiziun dals decasteris/nouva constituziun dal cussagl: Illa tschanteda dals 3 lügl 2019 sun gnieus scumpartieus ils decasteris scu segua:

President cumünel, administraziun: Andrea Gilli, vice-president Ramun Ratti; Finanzas e provedimaint sociel: Lucian Schucan, suppleant Andrea Gilli; Scoulas e cultura: Romeo Cusini, suppleant Lucian Schucan; Turissem: Ramun Ratti, suppleanta Ladina Tarnuzzer: Fabricas, planisaziun: Christian Florin, suppleant Romeo Cusini; Pulizia, agricultura, alps e gods: Andrea Gilli, suppleant Luis A. Wieser; Vias e trafic: Luis A. Wieser, suppleanta Ladina Tarnuzzer; Provedimaint d’ova, chanalisaziun, pumpiers, iglüminaziun ed immundizchas: Ladina Tarnuzzer, suppleant Christian Florin.

Tschernas e scumpart da las gruppas da lavur e cumischiuns: Eir las differentas gruppas da lavur e cumischiuns sun gnidas discutedas ed inua necessari adattedas. La cumpigliaziun es publicheda sün www.zuoz.ch suot la rubrica «vschinauncha».

Fabricas: Il cussagl cumünel ho relascho ils seguaints permiss da fabrica: Jachen Könz, Lugano: per la construcziun da la chesa nr. 6, Mariöl. Quality of Life AG, Zuoz: per müdamaints vi dal proget da l’hotel cun garascha, Chaunt da Crusch. Dario Verda, Agno: per la construcziun d’üna nouva fnestra da tet, Chesa Averts. Roman Grossrieder e Mena Bisaz, Zuoz: per la construcziun d’üna chesina d’üert, Via Nouva. Simon Salzgeber, S-chanf: per l’ingrandimaint da la lingia da distanza per transporter chalur sün differentas parcellas. Ches’Alva SA, Zuoz: a reguard sanaziun dal tet e serreda temporara da la Via Dimvih düraunt il temp da fabrica.

Contrats da dret da passagi culla SSZ AG, proget Albanas: La SSZ AG prevezza d’ingrandir l’implaunt d’innaivamaint sün Albanas. Perque dumandan els divers drets da passagi tres las parcellas 2435 e 2444 (Via d’Albanas) per pudair passer cullas lingias d’ova. Totelmaing vain traverseda la via trais voutas sün üna lungezza da 14 meters. Il cussagl es perinclet cul contrat e cul agir, uschè cha tel po gnir suottascrit üna vouta cha tuot ils proprietaris pertuchos haun do lur acconsentimaint.

Agir sanaziun parkegi Chastlatsch: Ad ho gieu lö ün supralö a reguard la sanaziun dal parkegi Chastlatsch e gnieu elavuro ün nouv proget detaglio scu nouva proposta. Quista prevezza cha l’access da la garascha da las chesas da la BG Blaisun vain fatta in betun e cha’l rest da la plazza vain zuglio cun materiel da reciclagi. Eir il chaunt chi maina dal parkegi süll’otezza da la Via Maistra dess gnir sano cun betun e fat gnir main stip. Tenor plan da quartier stu la BG Blaisun surpiglier 50 pertschient dals cuosts da la via d’access. Il cussagl decida da deliber l’import necessari scu credit dal cussagl e d’invier las lavuors da sanaziun.

Educaziun e cultura / Scoula da musica Engiadin’Ota, differenza rendaquint: La situaziun finanziela da la scoula da musica da l’Engiadin’Ota, chi vain almanteda per üna granda part tres il chantun Grischun e las vschinaunchas da la Regiun, ho do andit a discussiuns. La scoula da musica vess da pajer inavous ün dabun a las vschinaunchas. Per Zuoz as discuorra d’ün import da ca. 2500 francs. Il cussagl es perinclet da renunzcher sün quist import a favur da la scoula da musica, ma be suot las cundiziuns cha vain fat ün rendaquint detaglio, preschanto üna prognosa finanziela pel futur e cha la cunvegna da prestaziun traunter la scoula da musica e las vschinaunchas vain surlavureda.

Infurmaziuns our da las tschantedas da cumischiuns: Trafic Somvih: La situaziun da trafic in Somvih culs bgers camiuns chi vaun sü e giò nu saja bod na supportabla pels abitants. Our da quels motivs as ho comunicho als impressaris cha la Via Somvih po be gnir transida insü e cha ingiò es da fer adöver da la Via Mariöl e Plagnoula, scha la grandezza dals camiuns permetta la circulaziun.

Turissem: La destinaziun ESTM AG ho elavuro ün questiunari in connex culla gestiun dals posts d’infurmaziun aint ils lös. A Zuoz es previs ün uschedit «Flagship Store», insembel culla Viafier retica, la Posta ed eventuelmaing otras spüertas. Per surmunter l’elavuraziun d’ün concept cumplessiv füss da regler la collavuraziun pels ans 2020 e 2021. La dumanda es cu cha tuot quistas lezchas dessan gnir finanziedas in avegnir. La clev da scumpart regiunela füss la basa optimela per scumpartir ils cuosts sün tuot ils pertuchos in ün möd güstificho. Inavaunt es eir da surponderer l’organisaziun e las lezchas dals coordinatuors turistics (sün basa operativa) e da las cumischiuns da turissem (sün basa strategica). Ils presidents cumünels da la Plaiv sun da l’avis d’optimer la collavuraziun illa Plaiv e da reorganiser las structuras existentas.

Funtaunas/reservuars: Las funtaunas ed ils reservuars d’ova sun per part in fich nosch stedi. Üna sanaziun düraunt ils prossems ans fo absolutamaing dabsögn e stu gnir planiseda in detagl.

Förderverein Sessellifte Zuoz: La radunanza generela dal Förderverein ho decis da’s parteciper vi dal proget innaivamaint Albanas cun ün import da 350’000 francs e da vulair güder cotres eir in avegnir da mantegner la regiun da skis per famiglias. (cd)

Download PDF
Tuot las annunzchas ufficielas
A+
A-