Publicho: 7.04.2022

Noviteds dal cussagl cumünel

Noviteds dal cussagl cumünel da Zuoz

In sias tschantedas düraunts ils mais favrer e marz 2022 ho il cussagl traunter oter tratto e decis sur dal seguaint:

 

Tschernas nouvas collavuraturas e collavuratuors

La cumischiun da persunel ho popost al cussagl cumünel diversas persunaliteds per plazzas da lavur scrittas our da la vschinauncha da Zuoz. Il cussagl cumünel ho tschernieu a seguaintas persunas:

Sar Gian Marc Dosch, administraziun cumünela

Sar Peter Ulrich, servezzan tecnic

Sar Anton Duff, servezzan tecnic

Duonna Mirjam Frischknecht-Bieri, scoulina Zuoz/Madulain

Duonna Marina Bischoff, scoula primara Zuoz/Madulain

Sar Gerry Mazzucchi, servezzan tecnic (temporar)

 

Sur elavuraziun da la constituziun cumünela

La gruppa da lavur numneda dal cussagl cumünel ho in diversas tschantedas elavuro üna proposta a maun dal cussagl cumünel. La proposta vain uossa inoltreda al chantun Grischun per ün’examinaziun preliminera. Il böt es da suottametter la revisiun da la constituziun cumünela a la radunanza cumünela düraunt la sted da quist an. Que vess da der avuonda temp a la regenza chantunela da deliberer e metter in vigur la nouva constituziun a partir dals 1. schner 2023.

 

Tschernas da Chalandamarz 2022

A las tschernas dals 1. marz 2022, i’l seguond scrutin e la tscherna da rimplazzamaint dals 27 marz 2022 sun seguaintas persunas gnidas tschernidas:

Cussagl cumünel: Duonna Ladina Tarnuzzer, reeletta; Sar Cristian Ferrari, nouv

Cumischiun sindicatoria: Sar Niculin Arquint, nouv

Cumischiun da fabrica: Sar Marco Salzmann, reelet

Cussagl da Scoula: Duonna Karin Casty, nouva

 

Cun que sun las autoriteds cumünelas darcho cumplettas. Las prosmas tschernas haun darcho lö a Chalandamarz, ils 1. marz 2023.

  

Tet sela da gimnastica

Per la planisaziun da la sanaziun dal tet da la sela da gimnastica, ed eir las tualettas correspundentas, es fingià manifesto ün import da CHF 100‘000.00 aint il preventiv per l’an 2022. Dimena es planiso la progettaziun dal 2022 e la realisaziun dal 2023. Da manzuner es la dependenza da quist proget cul svilup dals areals Purtum e Plagnoula ed eir il svilup da Plaz e la plazza da scoula. La proposta es, da coordiner in ün seguond pass las intenziuns da las differentas fatschendas. Il depüto respunsabel, insembel cul mneder tecnic ed il mneder da las immobiglias cumünelas, tuorna cun propostas in cussagl cumünel.

  

Cuntinuaziun proget repars da lavinas Albanas

Sar Gian Clà Feuerstein, mneder regiunel da l’uffizi chantunel da god e prievels da natüra, ho preschanto la cuntinuaziun dal proget da la substituziun dals repars da lavinas sü Albanas. A maun dad üna preschantaziun da PowerPoint ho el fat ün cuort sguard inavous sün l’etappa 1 dal proget, chi ho cumanzo dal 2017 e vain a glivrer quist an. Sar Feuerstein ho oriento cha l’etappa 1 po gnir valüteda scu success. Eir ils cuosts sun stos considerabelmaing suot il preventiv. La vschinauncha da Zuoz vaiva delibero ün credit da CHF 4.7 milliuns ed ils cuosts totels saron finelmaing tar arduond CHF 3.1 milliuns. El ho alura spiego l’intenziun da l’etappa 2 chi stu gnir delibereda da la vschinauncha da Zuoz. Ils cuosts previs s’amuntan a CHF 1.7 milliuns e vegnan darcho subvenziunos considerabelmaing dal chantun. L’intenziun es da cuntinuer zieva la realisaziun da l’etappa 1 direct cun l’etappa 2. L’etappa 3 es pür previsa pü tard. La dumanda per ün credit da CHF 1.7 milliuns vain delibereda a maun da la radunanza cumünela dals 29 gün 2022.

  

Dumanda per sustegn finanziel per la scoula media professiunela Academia Engiadina

L’Academia Engiadina a Samedan ho inoltro a tuot las vschinaunchas da la Regiun Malögia üna dumanda per sustegn finanziel da la scoula media professiunela. La scoula media professiunela, chi instruescha in prüma lingia scolaras e scolars per misters sül champ da la sandet e la pedagogia, ho in fuond memma pochas scolaras e scolars per spordscher quist cuors sainza deficit. Quist ho motivo l’Academia Engiadina da dumander las vschinaunchas da la Regiun Malögia da surpiglier duos terz dal deficit. Per Zuoz füss que ün import annuel da ca. CHF 15‘000.00 per an pels ans da scoula 2022/23 fin 2027/28, dimena 6 ans. Il cussagl cumünel da Zuoz es da l’avis da na aderir a la dumanda. Que our da seguaints motivs:

La respunsabilited per la scoula media es tenor ledscha tal chantun. Uschè cha que füss fos scha la vschinauncha prastess contribuziuns sainza basa leghela.

La qualificaziun per misters da sandet e pedagogia po eir gnir ragiundscheda sur ün giarsunedi u sur il gimnasi.

Üna decisiun positiva significhess ün pregüdizi per otras dumandas da sustegn da scoulas ed instituziuns privatas.

  

Tscherna büro electorel e da votaziun

Il büro da votaziun exista al mumaint auncha our da 7 persunas, tuottas daspö bgers ans e cun grand‘experienza. Quist ho motivo l’administraziun cumünela da scriver our per chatter nouvas commembras e commembers ed augmanter la squedra existenta. Il cussagl tscherna seguaintas persunas per la gestiun dal büro electorel e da votaziun:

Badilatti Daniel, Frey Brigitte, Frey Christian, Hardegger Andrea, Müller Veronika, Wyss Sabina

  

Gruppa da lavur Zuoz 2025 „Plaz“

La gruppa da lavur preschainta al cussagl cumünel la proposta elavureda per l’adaptamaint da Plaz, voul dir la plazza da scoula. La proposta prevezza da minimier la pendenza, da circunder la plazza da scoula cun s-chelins e dad integrer üna nouva surtratta. Eir las s-chelas tar las entredas da la chesa da scoula primara e da la sela da gimnastica dessan gnir adattedas. Que in fuorma dad ün podest cumbino chi po eir fer adöver scu palc per occurrenzas. A maun dad ün plan e trais visualisaziuns ho il cussagl cumünel la pussibilited da’s fer ün purtret. I’l ram da las lavuors füss eir previs da piglier our il tanc dad öli dal vegl s-chudamaint, chi nu fo pü üngün adöver. Il cussagl deliberescha la proposta a maun da la radunanza cumünela dals 29 gün 2022.

  

Prolungiaziun cunvegna cul Lyceum Alpinum Zuoz a reguard la gestiun dals glatschs

La cunvegna existenta cul Lyceum Alpinum Zuoz, chi d’eira gnida stipuleda per tschinch ans (2017–2022) e scrouda a la fin da quista stagiun d’inviern, ho da gnir prolungeda. Il cussagl cumünel es unanimamaing perinclet da prolunger la cunvegna suot las listessas premissas finanzielas e da la spüerta. La cunvegna prolungeda po gnir desditta da tuottas duos varts minch’an a la fin da l’an sülla fin da la stagiun d’inviern. Que eir suot la circunstanza cha la vschinauncha observa la situaziun a reguard ün center da glatsch regiunel e valütescha la situaziun per ün eventuel glatsch artificiel insembel cul Lyceum Alpinum Zuoz.

 

Realisaziun zona d’inscunter

Zieva cha la zona d’inscunter, chi ho stuvieu gnir inoltreda sur il chantun, es gnida delibereda es la realisaziun il prossem pass. Il proceder sur il chantun ho dumando ün’expertisa detaglieda cun imsüras da trafic e valütaziuns da divers parameters scu sort da vias, surtratta da las vias, la situaziun d’inviern e da sted ed oter. L’expertisa elavureda dal büro d’indschegner Fromm + Partner es gnida accepteda da las instanzas chantunelas e cun que eir las imsüras per la realisaziun da la zona. La zona d’inscunter i’l minz da Zuoz cumpiglia il Stradun da la Chesa Müller fin tar la cruscheda Magni/Garascha Bott e Plaz fin sü Somvih per ir vi la Via Nouva ed intuorn Plaz fin tal Volg e la Straglia Pezzi. In tuot la zona d’inscunter vela il limit da tempo per veiculs motorisos e na motorisos da 20km/h ed il pedun ho adüna precedenza. Tar las imsüras es prescrit da signaliser mincha entreda e sortida da la zona d’inscunter. La realisaziun es planiseda pel cumanzamaint gün.

 

Infurmaziun nouvas adressas

Per la sted quist’an es previssa l’installaziun da las nouvas adressas illa vschinauncha da Zuoz. Zieva cha’l chantun ho fat bun il proget es l’administraziun cumünela landervi dad implir ils programs digitels cullas nouvas adressas. Quistas sun drizzedas zieva las differentas entredas dals edifizis in vschinauncha, e na pü zieva il numer da sgüraunza. Eir ün pêr noms da vias müdan causa il nouv sistem u clappan ün nouv nom. La populaziun, voul dir possessuras e possessuors ed eir abitantas ed abitants vegn infurmeda, dalum cha las lavuors digitelas sun realisedas.

 

Download PDF
Tuot las annunzchas ufficielas
A+
A-