In sias ultimas tschantedas ho il cussagl cumünel traunter oter tratto e decis sur dal seguaint:

La cumischiun da planisaziun ho tratto arduond 180 differentas idejas, remarchas e reclamaziuns, chi sun gnidas inoltredas i’l ram da la partecipaziun publica da la planisaziun dal lö. Impustüt a reguard la tematica in connex cula situaziun da spazi d’abiter primar e secundar sun gnidas inoltredas diversas pusiziuns. Il cussagl cumünel decida dad introdür ün scumand da pudair müder abitaziuns tenor vegl dret, ma cun ün dovair dad abitaziun primara, las uschedittas prümas abitaziuns inscrittas (39 abitaziuns), zieva üna tscherta quantited dad ans in ün’abitaziun secundara cun pajer ün import. Las otras dumandas e propostas our da la partecipaziun publica vegnan evaluedas da la cumischiun da planisaziun. Il cussagl cumünel es da l’avis da na vulair piglier influenza sün possess privat, cha las imsüras dumandedas haun poch effet e da na vulair pericliter entredgias importantas da las impostas (trapass e sül acquist dad immobiglias). Impü es il cussagl cumünel da l’avis dad esser fingià activ in chosa cun realiser spazi d’abiter illa Posta Veglia, cun promouver ün proget da la Viafier Retica a la Staziun e cun promouver la fabrica dad abitaziuns primaras in Curtin Plavaunt. Eir la mobilisaziun da terrain da fabrica, chi’d es tenor dret superiur illa nouva ledscha cumünela da fabrica, promouva nouv spazi d’abiter primar. Cun üna cifra d’ütilisaziun da 0.5 e calculand 150m2 per abitaziun es avaunt maun a Zuoz terrain da fabrica per arduond 200 abitaziuns.

Scu comunicho illas medias ho la banca Raiffeisen desdit il contrat da fittaunza illa Posta Veglia pel plaun terrain ed il plaun suotteraun sülla fin gün 2025. La proposta dal cussagl cumünel es da spuster la biblioteca sül plaun terrain per avair üna megldra spüerta ed eir pudair esser ün lö d’inscunter. Sül plaun sur dess gnir realiso spazi d’abiter per indigens ed aint il plaun suotteraun dess gnir spüert üna localited per societeds ed otras organisaziuns per tschantedas ed inscunters. La radunanza cumünela ho aderieu ad ün credit da CHF 380‘000 per realiser las intenziuns. Il böt es da piglier a maun la planisaziun immediatamaing per pudair cumanzer las lavuors da fabrica düraunt la sted. Cun que vess l’edifizi dad esser pront pel nouv adöver vers la fin da l’an 2025.

A reguard tuot il areal Purtum do que divers puncts chi sforzan il cussagl cumünel da gnir activ. Que’s tratta dal stedi suboptimel da l’edifizi Center da sport Purtum, dumandas privatas per parkegis i’l quartier suot Purtum, la veglia dumanda per l’access da la part sur da la vschinauncha ed eir l’adöver da la plazza da sport. Il cussagl cumünel decida dad incumbenzer üna planisaziun dad areal per tratter idejas e soluziuns in ün möd cumplessiv ed our dad üna perspectiva dadour. Scu areal dess gnir resguardo tuot il terrain dal Stradun in San Bastiaun, sü da la Via Chöntschet e la Via Davous Crasta, tuot il territori Purtum ed inclus eir la Chesa dals Pesters e la Chesa Sprecher. Üna planisaziun dad areal dess spordscher la basa per elavurer pass futurs, sainza realiser impedimaints tres singuls progets. Il cussagl cumünel dumanda in ün prüm pass dittas adattedas e professiunelas per offertas.

La situaziun da realiser plazzas da glatsch natürelas es causa il svilup climatic adüna pü difficila. Divers tschegns our da la populaziun ed eir il discuors cul Lyceum Alpinum Zuoz haun motivo il cussagl cumünel da fer sclarimaints in chosa. Divers lös sun gnieus evaluos scu pussibels lös per ün glatsch artificiel in futur. Il cussagl cumünel perseguitescha inavaunt l’ideja, eir i’l ram da la planisaziun dad areal sü Purtum.

La „Ski- und Sessellifte Zuoz AG“ (SSZ AG) ho infurmo il cussagl cumünel cha la concessiun per la s-chabellera Pizzet scada zieva 20 ans la fin da l’an 2026. La vschinauncha da Zuoz posseda arduond 46% da las aczias da la SSZ AG ed ho eir concedieu imprasts considerabels e sustgnieu la gestiun cun imports annuels. Il cussagl administrativ da la SSZ AG ho invio la discussiun cul cussagl cumünel sur d’üna partecipaziun vi da la finanziaziun dad üna sanaziun da la s-chabellera actuela per ün’ulteriura concessiun sur 20 ans u ün rimplazzamaint cun ün nouv implaunt, cun üna concessiun sur 40 ans. Il cussagl cumünel ho da resguarder la situaziun finanziela da la vschinauncha e da surelavurer il plan da finanzas cun tuot las investiziuns cuntschaintas in vschinauncha ed eir da la Regiun Malögia. Zieva tuot ils sclarimaints decida il cussagl cumünel suot che cundiziuns cha pudess gnir suottamissa üna dumanda da credit a la radunanza cumünela per l’infrastructura futura da la SSZ AG.

Zieva cha duonna Vanessa Roost ho, zieva 20 ans tar la vschinauncha da Zuoz, inoltro la desditta scu mnedra da la scoula primara Zuoz/Madulain, es la plazza gnida scritta our. Il cussagl da scoula ho valüto tuot las annunzchas entredas e propuona a duonna Corina Derungs scu nouva mnedra da la scoula primara Zuoz/Madulain. Corina Derungs abita a Zuoz, es magistra primara cun 20 ans experienza a diversas scoulas in Engiadin’Ota. Ella sto a disposiziun a partir da l’an scolastic 2026/27 per ün pensum da 60%. Il cussagl cumünel es perinclet tscherna unanimamaing a duonna Corina Derungs scu nouva mnedra da scoula a partir da l’an scolastic 2026/27. Il cussagl cumünel gratulescha cordielmaing, s’allegra sün üna buna collavuraziun ed es persvas dad avair chatto la güsta persuna per cuntinuer il svilup scu lö da furmaziun. Il cussagl da scoula es intaunt landervi dad elavurer ed organiser üna soluziun transitorica per las respunsabiliteds e lezchas da maina scoula per l’an scolastic 2025/26.

Las vschinaunchas traunter S-chanf e Bever sun daspö sur ün an in discussiun a reguard ün management dad ova cumünaivel. Illas discussiuns ed ill’elavuraziun da variantas ed idejas es gnida sü l’opziun dad integrer las ledschas d’ün management dad ova illas structuras da l’ARO („Verband Abwasserreinigung Oberengadin“). Ad haun fingià gieu lö prüms discuors culla ARO. Els vezzan üna tela integraziun, basand sün ün müdamaint dals statüts. Per sclarir in detagl la chosa sun ils cussagls cumünels da las vschinaunchas involvedas dumandos da trer üna decisiun da basa per cuntinuer ils sclarimaints insembel cun l’ARO. Il cussagl cumünel piglia a cugnuschentscha il svilup ed es unanimamaing perinclet da cuntinuer ils sclarimaints.

A reguard ün eventuel ingrandimaint dal Parkegi Centrel ho il cussagl cumünel do in incumbenza üna stima groba da cuosts cun predschs actuels. La stima permetta al cussagl cumünel da cuntinuer cul proget, chi vain be realiso, scha tel resta finanzielmaing neutrel per la vschinauncha da Zuoz. Quel voul dir scha avuonda persunas s’annunzchan e s’impegnan per ün acquist da parkegis illa nouva annexa, vain quista eir realiseda. La dumanda concreta ad abitantas ed abitants, dittas e possessuras e possessuors da seguondas abitaziuns segua auncha düraunt il 2025.