Progets provedimaint d’ova La Plaiv

Las vschinaunchas da Zuoz, Madulain, La Punt Chamues-ch e S-chanf haun in diversas chantedas evaluo ils dovairs a reguard ova potabla ed ova d’adöver. Sün basa da differentas situaziuns illas vschinaunchas, differents dovairs ed oters progets chi influenzan pussibels svilups, propuona la gruppa da lavur dad incumbenzer üna planisaziun per evaluer ils bsögns da mincha vschinauncha e las differentas pussibiliteds per ragiundscher ils böts. Il cussagl cumünel aderescha al agir ed als cuosts, chi vegnan spartieus traunter las vschinaunchas tenor clev regiunela.

Proget Suolch Champagna – surdeda lavuors planisaziun
Zieva avair realiso diversas imsüras d’urgenza sur divers ans, as ho piglio a maun l’evaluaziun per ün proget per schoglier la problematica dal chanel dad ova Suolch Champagna. Que’s tratta da realiser üna revitalisaziun da l’ovel da la Val Urezza, la protecziun dad ovaziuns ed in seguit il colliamaint fin tar l’En. Imsüras da quist gener vegnan eir subvenziunedas dal chantun. Per evaluer las pussibiliteds e cuosts vain incumbenzo il büro specialiso Caprez Ingenieure AG.

Persunel scoula primara e scoulina Zuoz/Madulain

Per l’an da scoula 2026/27 ho il cussagl cumünel scrit oura seguaintas plazzas aviertas e tschernieu seguaintas persunas propostas dal cussagl da scoula:

Tet sela da gimnastica
Già avaunt trais ans as ho constato dans vi dal tet da la sela da gimnastica, chi sun gnieus reparos. Uosso ho que da nouv dans e culla naiv chi algua guotta ova illa sela. Il cussagl cumünel ho decis da progetter ün eventuel rimplazzamaint dal tet e da lascher fer üna stima da cuosts. La stima da cuosts s’amunta a CHF 180‘000 per rimplazzer il tet. Il cussagl cumünel es da l’avis, cha aunz üna decisiun per ün nouv tet as vess da fer ils sclarimaints sch’ün augmaint da l’edifizi in ot es pussibel e realistic per ün adöver da la vschinauncha da Zuoz. Sün basa da tuot ils sclarimaints voul il cussagl cumünel decider sur l’agir in futur.

Adattamaints Chesa dals Pesters
Il cussagl cumünel vaiva decis sün dumanda dal cussagl da scoula, cha la scoulina vain a partir dal l’an scolastic 2026/27 gestiuneda in üna gruppa causa la cifra dad iffaunts. Que dumanda zieva adattamaints da las localiteds illa Chesa dals Pesters. Pondero es da collier duos locals cun üna nouva porta e dad optimer la situaziun tar las fnestras per fer sumbriva cun ün nouv parasulagl. Il cussagl cumünel deliberescha CHF 17‘000.00 per realiser las lavuors necessarias düraunt las vacanzas da sted.

MiaEngiadina – agir davart dovairs dal passo ed a reguard il futur
La vschinauncha da Zuoz es daspö l’an 2016 collieda culla MiaEngiadina e sias dittas MiaEngiadina Network SA (MENSA) e la MiaEngiadina Marketing SA (MEMSA). Zuoz ho realiso ün‘egna rait da fibra optica chi’d es collieda culla lingia principela (Backbone) scu otras vschinaunchas eir. Zuoz piglia aint üna rolla speciela, siand cha incunter las otras vschinaunchas nun es avaunt maun ün ouvra electrica, chi funcziuna scu gestiunari da la rait cumünela. Da manzuner es cha la collavuraziun culla MEMSA nun es me gnida stipuleda in ün contrat. Cun que es hoz il cas, e que daspö arduond 8 ans, cha la MEMSA ütilisescha la rait a Zuoz per sia cliantella sainza basa da contrat. La MENSA ho fat valair ün import dad arduond CHF 150‘000 per ils ans 2018 fin 2025 cha la vschinauncha da Zuoz es in debit. Quist import cumpiglia già las contribuziuns cha la vschinauncha da Zuoz clappa per cliaint sülla rait. La direcziun da la vschinauncha da Zuoz ho in diversas tschantedas cun rapreschantants da la MENSA, la MEMSA ed eir la Energia Engiadina scu gestiunari tecnic per la MiaEngiadina, pudieu valüter ils cuosts miss in quint. Cun tuot la documainta avaunt maun e las explicaziuns da las persunas involvedas es il debit güstificho. Per il futur haun lö discuors in differentas direcziuns. Il cussagl cumünel es perinclet cul agir e deliberescha dad egualiser il debit dal passo tar la MENSA.

Pumpiers Plaiv – Vendita auto-s-chela (ADL) a la sgüraunza d’edifizis dal Grischun (GVG
La sgüraunza d’edifizis dal Grischun surpiglia a partir da dalum tuot ils veiculs auto-s-chela da las vschinaunchas u corporaziuns da pumpiers. Que per unificher la gestiun ed il mantegnimaint da quists veiculs. Ils veiculs nouv in possess da la sgüraunza vegnan alura fittos a tuot las organisaziuns da pumpiers. Il cussagl cumünel es perinclet dad aderir a la vendita per CHF 140‘000 e fitter il veicul in futur.

Cunvegna da prestaziun - Inscunter da chaunt 2028/2030/2032
Per sgürer la gestiun e l’evenimaint dal inscunter da chaunt dess gnir stipulo cull’organisaziun üna cunvegna da prestaziun per las prosmas 3 ediziuns. La prüma ho gieu lö dal 2024 e per la seguonda ediziun ho il cussagl cumünel aderieu ad üna contribuziun i’l ram da sia cumpetenza. Il cussagl cumünel decida da stipuler üna cunvegna da prestaziun per las ediziuns 2028, 2030 e 2032. Las prestaziuns da la vschinauncha da Zuoz cumpiglian üna contribuziun finanziela da CHF 5‘000.00, il metter a disposiziun localiteds cumünelas ed il sustegn da la gruppa da lavur cun prestaziuns materielas e persunelas. L’organisaziun dal inscunter da chaunt vain oblieda da realiser las ediziuns in settember dals ans numnos per üna spüerta culturela düraunt la stagiun bassa.

Dumanda da sustegn – Champiunedis mundiels 2028 Olympia Bobrun San Murezzan/Schlarigna
Dal 2028 haun lö sül Bobrun San Murezzan/Schlarigna champiunedis mundiels chi cumpiglia concurrenzas da bob e skeleton e que eir per persunas cun impedimaints. L’organisaziun spetta cuosts totels dad arduond CHF 1.75 milliuns. Las vschinaunchas da San Murezzan e Schlarigna spordschan üna contribuziun da CHF 200‘000 respectivmaing 100‘000. Tuot las otras vschinaunchas da la regiun Malögia dessan contribuir CHF 150‘000 e que sur duos ans (2027 e 2028). Per la vschinauncha da Zuoz sun que CHF 7‘423.80 per an. Il cussagl cumünel decida unanimamaing da prevzair ils imports i’ls preventivs 2027 e 2028 suot las resalvas cha’ls preventivs vegnan appruvos e cha la ditta Olympia Bobrun nu vain sustgnida sur la finanziaziun dad evenimaints da la destinaziun turistica.