Infurmaziuns radunanza cumünela 23 november 2022

Zuoz sbassa las impostas

La radunanza cumünela da Zuoz dals 23 november 2022 ho aderieu a tuot las propostas dal cussagl cumünel. Il preventiv 2023 es gnieu accepto e l’infurmaziun a reguard l’uorden da Chalandamarz piglieda a cugnuschentscha.

50 votantas e votants haun visito la radunanza cumünela da Zuoz dals 23 november 2022. Il preventiv per l’an 2023 cun ün suravaunz da las expensas da CHF 365‘754.00 ed investiziuns da net CHF 2.85 milliuns es gnieu accepto unanimamaing. Il pè d’impostas cumünelas vain sbasso per l’an 2023 per 10% sül livel da 65% da l’imposta chantunela simpla. Quist zieva duos rendaquints fich allegraivels i’ls ultims duos ans. Impü es il cussagl cumünel da l’avis cha siand cha i’ls prossems ans nu sun previsas investiziuns extraordinarias, nun es que la lezcha da la vschinauncha da mantuner raps d’impostas.

Inavaunt ho il cussagl cumünel infurmo a reguard l’uorden da Chalandamarz. Quist es sto tractando a la radunanza cumünela dal gün 2022. Zieva üna constructiva discussiun cun bunas idejas e remarchas our dal ravuogl ho il cussagl cumünel da sieu temp retrat l’affer aunz la votaziun per sur elavurer aunch’üna vouta la fatschenda. Zieva passer pled culla cumischiun da Chalandamarz e divers sclarimaints bilaterels ho il cussagl cumünel decis dad incumbenzer la cumischiun da Chalandamarz dad elavurer üna proposta per integrer las mattas in fuorma maximela i’l Chalandamarz sülla basa da l’uorden da Chalandamarz existent. L’uorden existent permetta la partecipaziun da tuot ils iffaunts da scoula. Scu cha la realisaziun da l’integraziun da las mattas guard’oura concret, vain auncha definieu aunz Nadel da quist an e miss in vigur pel Chalandamarz 2023.

Ulteriur ho il cussagl cumünel infurmo sur da l’agir a reguard las tematicas da la periclitaziun da maungel d’energia e la situaziun a reguard terrain da fabrica per spazi d’abiter per indigens. Idejas da proget per la sanaziun dal sunteri sun gnidas preschantedas cun prümas visualisziuns ed eir la nouv’iglüminaziun da Nadel, chi permetta da spargner energia considerabelmaing, es gnida piglieda a cugnuschentscha da la radunanza cumünela.

A+
A-