Infurmaziuns radunanza cumünela 24 november 2021

Zuoz aderescha a la nouva cunvegna da prestaziun culla fundaziun dal provedimaint da sandet Engiadin‘Ota

La radunanza cumünela da Zuoz dals 24 novmeber 2021 ho aderieu a tuot las propostas dal cussagl cumünel. Sper il preventiv ed il pè d‘impostas 2022 eir ad üna nouva plazza da lavur ill’administraziun cumünela ed a la cuntinuaziun da la cunvegna culla fundaziun dal provedimaint da sandet Engiadin‘Ota

28 votantas e votants haun her saira visito la radunanza cumünela da Zuoz. Il preventiv per l’an 2022 cun ün suravaunz da las expensas da CHF 212‘460.00 ed investiziuns da net CHF 3.55 milliuns es gnieu accepto unanimamaing. Il pè d’impostas cumünelas vain lascho sül livel da 75% da l’imposta chantunela simpla.

Il cussagl cumünel ho propost a la radunanza cumünela da deliberer üna nouva plazza da lavur ill’administraziun cumünela. Que in connex cun üna restructuraziun, per offrir assistenza sün divers livels e per optimer la situaziun da substituziun. La radunanza ho delibero la nouva plazza sainza cuntravuschs.

Finelmaing ho la radunanza cumünela aderieu a la nouva cunvegna da prestaziun culla fundaziun dal provedimaint da sandet Engiadin’Ota. La cunvegna da prestaziun culla fundaziun, chi ho surpiglio las lezchas da la gestiun da l’ospidel, da la coordinaziun da chüra d’attempos e la spüerta da la Spitex dal 2018 dal Circul Engiadin’Ota, scrouda la fin da quist an e stu gnir renoveda pels ans 2022 fin 2025. Que per ün import considerabel pü ot. Nouv prevezza la cunvegna üna contribuziun da tuot las vschinaunchas da l’Engiadin’Ota da totel CHF 2.75 milliuns per an, CHF 1.216 milliuns dapü scu fin uossa. Per la vschinauncha da Zuoz sun que tenor clev regiunela CHF 171‘100.00 per an. La radunanza aderescha a la nouva cunvegna sainza cuntravuschs.

A+
A-