Infurmaziuns radunanza cumünela dals 24 gün 2026

40 votantas e votants haun a la radunanza cumünela dad her saira appruvo il rendaquint 2025 unanimamaing. Impü ho la radunanza decis da der al cussagl cumünel la cumpetenza da tratter pussiblas venditas da terrain cumünel.

Il rendaquint 2025 serra giò cun ün resultat equilibro. Il quint annuel serra cun sortidas ill’otezza da CHF 13‘091‘683.42 ed entredgias da CHF 13‘118‘178.50 cun ün suravaunz da las entredgias da CHF 26‘495.08. Que zieva amortisaziuns ordinarias ed extraordinarias ill’otezza da totelmaing CHF 1‘636‘054.29.

Las investiziuns nettas düraunt l’an 2025 s’amuntan sün CHF 4‘392‘233.49. Cun quist import as ho pudieu realiser differents progets. Pels 31 december 2025 dispuona la vschinauncha da Zuoz dad üna buna substanza finanziela cun debits da CHF 6.0 milliuns. Il cash-flow operativ, chi’s cumpuona dal suravaunz da las entredgias, da las amortisaziuns e dals surports/retirs da las finanziaziuns specielas, s’amunta a CHF 2‘133‘518.13.

Illa zona da misteraunza (Resgia/Curtinellas) ho la vschinauncha da Zuoz aderieu sur ils ans divers drets da fabrica per promouver la misteraunza indigena. Drets da fabrica haun üna tscherta düreda e que do la pussibilited, cha possessuras e possessuors da drets da fabrica nu prolungeschan tels. In quel cas, füss la vschinauncha oblieda da surpiglier ils edifizis fabrichos cul dret da fabrica ed indemniser ils cuosts seguond contrats stipulos. Il cussagl cumünel ho l’intent da tratter pussiblas venditas da terrain cun possessuras e possessuors chi haun fabricho sül terrain cun ün dret da fabrica. Cun que dess spüert a la misteraunza indigena la pussibilited da’s svilupper. Il cussagl cumünel es da l’avis, cha la vendita ho dad esser lieda vi da resalvas chi excludan cha quists terrain dvaintan ogets da speculaziun. La radunanza cumünela sustegna quista pusiziun e do al cussagl cumünel cun granda magiurited la cumpetenza da tratter cun interessedas ed interessos. La cumpetenza da decider üna vendita resta tar la radunanza cumünela.

Zuoz, ils 25 gün 2026/PS