Publicaziun ufficiela

Procedura da concessiun e d'approvaziun dals plans tenor il dretg da telefericas (procedura ordinaria cun examinaziun ecologica, EE)

Exposiziun publica dals plans per la construcziun ed il manaschi da la sutgera da 4 Cuort San Gian – Pizzet

Vischnanca:

Zuoz

Petenta:

Sutgeras e runals da Zuoz SA, Via Dimvih 6, 7524 Zuoz

Object:

Construir e manar ina sutgera da 4 cun cludigls accuplabels davent da Cuort San Gian fin a Pizzet. Implant da diever, capacitad da transport dad 800 p/h (stadi final). Remplazzar la sutgera da 3 existenta (onn da construcziun 2006) sin quasi il medem trassé (staziun da val spustada levamain da la vart).

Staziun da val Cuort San Gian: 1854,88 m s.m.

Staziun da muntogna Pizzet: 2454,35 m s.m.

Construcziun da las staziuns:

Staziun da val:

Staziun da tracziun, paraids exteriuras e fatschadas construidas en lain, garaschas per ils vehichels incl. lavuratori, localitads da manaschi, local da cumond ed indrizs sanitars per il persunal; tut las installaziuns tecnicas necessarias per la sutgera; adattaziuns dals conturns

Staziun da muntogna:

Staziun da deviaziun, nova staziun cumpacta, local da cumond separà, tut las installaziuns tecnicas necessarias per la sutgera; adattaziuns dals conturns.

Ulteriuras indicaziuns:

Vehichels: 39 sessels da 4 cun cuplas da protecziun cunter l'aura; differenza d'autezza: 599,47 m; lunghezza orizontala: 1497,75 m; lunghezza inclinada: 1615,98 m; dumber da pitgas: 11; manaschi d'enviern, transport amunt.

Ulteriurs detagls dal project da construcziun èn cuntegnids en l'exposiziun publica dals plans.

Elements dal project / stabiliments accessorics:

Sco elements dal project da sutgera valan las suandantas infrastructuras resp. lavurs da construcziun:

demontascha da la sutgera existenta (cun excepziun dal plaun sutterran da la garascha existenta);

adattaziun da las colliaziuns dals conducts d'ovra en il sectur da la staziun da val (incl. foss en la via d'access);

ulteriura utilisaziun dal plaun sutterran en la staziun da muntogna existenta;

adattaziuns dal terren / dals access tar las staziuns;

trafo supplementar en la staziun da val.

Ulteriurs detagls en chaussa èn cuntegnids en l'exposiziun publica dals plans.

Cun il project qua avant maun n'èn colliads nagins stabiliments accessorics (pistas, indrizs d'ennavar e.u.v.).

Obligaziun da far in'examinaziun ecologica:

Per projects da pendicularas en la procedura d'approvaziun dals plans ordinaria sto vegnir fatga in'examinaziun ecologica tenor la cifra 60.1 da l'agiunta tar l'Ordinaziun davart l'examinaziun ecologica (OEE; CS 814.011). La petenta ha agiuntà in rapport davart la cumpatibilitad ecologica tenor l'art. 8a OEE als documents dal project.

Procedura:

La procedura d'approvaziun dals plans sa drizza tenor la Lescha federala davart la procedura administrativa (LFPA; CS 172.021), uschenavant che la Lescha federala davart las telefericas transportond persunas (LTTrP, CS 743.01) na divergescha betg da tala. Subsidiarmain vegn applitgada la Lescha da viafier (LViafier; CS 742.101). L'autoritad directiva per la procedura e l'autoritad d'approvaziun è l'Uffizi federal da traffic.

Exposiziun publica:

Ils plans pon vegnir consultads da venderdi, ils 3 da fanadur, fin gievgia, ils 3 da settember 2026, durant las uras d'avertura ordinarias tar l'administraziun communala da la vischnanca da Zuoz.

(Remartga: Tenor l'art. 22a al. 1 lit. b LFPA vegnan ils termins sistids dals 15 da fanadur fin e cun ils 15 d'avust 2026)

Stajaziun:

Tenor l'art. 13 da l'Ordinaziun da telefericas (OTTrP; CS 743.011) sto in project da pendicularas vegnir stajà resp. profilà. Per quest intent ha la petenta agiuntà documents correspundents. La stajaziun sto vegnir fatga a norma da quests documents. Las staziuns na vegnan betg profiladas. La profilaziun violass numnadamain il profil da spazi liber dal stabiliment existent ed impediss las lavurs da revisiun prescrittas. A la staziun da val è montada ina tavla d'infurmaziun davart il project.

Protestas:

Tgi ch'è partida tenor las prescripziuns da la LFPA, po far protesta tar l'autoritad d'approvaziun durant il temp d'exposiziun.

Tgi ch'è partida tenor las prescripziuns da la Lescha federala davart l'expropriaziun (LExpr; CS 711), po far valair tut las dumondas tenor l'art. 33 LExpr durant il temp d'exposiziun (protestas cunter l'expropriaziun; dumondas tenor ils art. 7–10 LExpr; dumondas da prestaziuns materialas tenor l'art. 18 LExpr; dumondas d'extensiun da l'expropriaziun tenor l'art. 12 LExpr; dumondas d'indemnisaziun da l'expropriaziun).

Las protestas ston vegnir inoltradas en scrit entaifer il temp d'exposiziun (data dal bul postal) en dus exemplars a l'Uffizi federal da traffic, Secziun Permissiuns I, 3003 Berna. Tgi che na fa betg protesta, è exclus da l'ulteriura procedura.

Objecziuns cunter la stajaziun ston vegnir inoltradas immediatamain a l'Uffizi federal da traffic, en mintga cas dentant avant ch'il temp d'exposiziun è scadì (art. 18c al. 2 LViafier).

Uffizi d'agricultura e da geoinfurmaziun
Daniel Buschauer