Veröffentlicht: 11.06.2019

Neuigkeiten des Gemeinderates

In occasiun da sias tschantedas düraunt il mais da marz ho il cussagl cumünel da Zuoz traunter oter decis il seguaint:

Fabricas: Nedeljka e Heinz Imhof, Oberrohrdorf: Installaziun d’üna pumpa da chalur cun sondas, Surmulins. Martina Rübel, Winterthur: Sanaziun interna da la Chesa Nuschpigna, Dimvih d’Aguêl.

Planisaziun dal lö. Decisiun a reguard zona da planisaziun: Tenor il departamaint d’economia publica dal Grischun haun tuot las vschinaunchas cun memma reservas da zonas da fabrica da stipuler üna zona da planisaziun sur tuot il territori da la vschinauncha. Eir la vschinauncha da Zuoz ho tenor la calculaziun da basa üna reserva memma granda. Ils planiseders STW da Cuira sun però incumbenzos da verificher las cifras ed haun signaliso cha la reserva pudess gnir bainquaunt pü pitschna üna vouta cha la controlla detaglieda es glivreda. Tuottüna pretenda il Chantun cha stu gnir relascho üna zona da planisaziun fin il pü tard ils 20 marz 2019, uschigliö vain tela relascheda dal Chantun. Our da quels motivs decida il cussagl da relascher üna zona da planisaziun sur tuot il territori da la vschinauncha per üna düreda maximela da duos ans. Dalum cha’ls fats a reguard reserva da zona da fabrica sun sün maisa po la zona gnir scholta.

Svilup areal Center Sur En/Al/Resgia: Ad haun gieu lö divers discuors culs pertuchos da quista zona chi vain sfrütteda fermamaing da differents partieus. Eir cul Lyceum Alpinum ho gieu lö ün inscunter per orienter sur dals plans. Per la sted dess gnir installo üna plazza da muvimaint, adatto l’access da la foura 1 dal Golf e gnir tratta üna lingia d’ova e da forz’electrica dal trafo in Resgia fin tar la sela Pradels ed oter pü. La lingia d’ova e da forz’electrica ho eir d’inviern üna grand’importanza, nempe per pudair naiver in avegnir in vicinanza da la sela Pradels e remisa Curtinatscha, invezza in Resgia inua cha que do adüna darcho problems culs cunfinants. Per l’inviern dess eir gnir adatto la garascha per la maschina da fer loipas ed a vain stüdgio zieva sur da nouvas loipas da passlung per fer cuorsas. Ils divers singuls progets dessan gnir cumbinos scha mê pussibel in ün proget cumplessiv per accumplir tuot ils bsögns.

Cussagl cumünel: Saramantaziun dal nouv cusglier Luis A. Wieser. Il president cumünel Andrea Gilli saramantescha in rumauntsch il nouv elet cusglier cumünel Luis A. Wieser seguond la fuorma indicheda i’l artichel 38 da la constituziun cumünela. Cun que aintra il nouv elet in carica cun tuot ils drets e dovairs da sieu uffizi e surpiglia il decasteri vias, trafic e digitalisaziun scu successur da Thomas Pinchera.

Strategia Zuoz 2025: La firma Quant ho elavuro insembel cul cussagl ils prossems pass da la strategia Zuoz 2025. Zieva cha s’ho sincroniso il cuntgnieu dal plan directiv da planisaziun (KRL) culla strategia es uossa da definir la direcziun strategica per concretiser ils böts e las imsüras i’ls singuls champs. Quists vegnan elavuros cun maisas arduondas, inua cha’s invida persunas specialisedas per ramasser lur opiniun per zieva concretiser eir cò böts ed imsüras. Quistas maisas arduondas haun lö al principi d’avrigl e vegnan moderedas dals cusglieders. Il cussagl discuta eir ils termins e constata cha que fess sen da coordiner la procedura dal KRL, chi’s rechatta pel mumaint illa pre-examinaziun tal Chantun, e la cooperaziun publica da la strategia insembel cun üna radunanza d’infurmaziun, scha me pussibel düraunt la sted.

Immundizchas: Serragio Plagnoula/Via Nouva: lö da ramassamaint dal rüt.

Il Serragio nu dess in avegnir pü gnir druvo scu lö per bagner la bês-cha, dimpersè scu nouv lö da ramassamaint dal rüt pel quartier Mariöl, Albanas e Surmulins. Ad es previs l’installaziun da quatter moloks (duos da rüt, ün da vaider ed ün da palperi). Duos dals quatter moloks vegnan piglios davent tar las chesas Mariöl ed installos nouv aint il Serragio. Duos ulteriurs moloks es da cumprer nouv. Il chamannin dal rüt existent sün Via Nouva dess rester, ma gnir imbellieu l’aspet pel mumaint poch bel. (cd)

Download PDF
Alle amtlichen Anzeigen
A+
A-