In occasiun da sias tschantedas düraunt il mais d’avrigl ho il cussagl cumünel da Zuoz traunter oter decis il seguaint:

Fabricas: Quality of Life AG, 7524 Zuoz: per la sanaziun e transfurmaziun dal ex-Hotel Wolf, Chaunt da Crusch. Üna cunvegna regla d’üna vart la sanaziun e renovaziun dal vegl Hotel Wolf in abitaziuns secundarias sülla parcella 1717 e da l’otra vart la construcziun d’ün nouv hotel tenor il proget Botta sülla parcella 2966. Per tuots duos progets ho la Quality of Life ün permiss da fabrica ed ad es previs da cumanzer cullas lavuors auncha in avrigl 2019. Andri Casty, Zuoz: per üna nouva remisa per gillinas, Pundschermaun Martina Rübel, Zuoz: per l’installaziuns da pumpas da chalur, Dimvih d’Aguêl Vschinauncha da Zuoz: per la sanaziun totela da l’infrastructura in Foura Chanels Vschinauncha da Zuoz: per la sanaziun da Via Aguêl, part pravenda catolica vers S-chanf, nouva salascheda.

Commerzi e misteraunza, turissem: Dumanda da credit per ün veicul per fer stizis: Il cussagl discuta il bsögn per la cumpra d’ün nouv veicul per fer stizis da passlung al cumanzamaint da la stagiun d’inviern cur cha nu’s po auncha druver il ratrac. Quista nouva maschina cuosta circa 45’000 francs e la gestiun dal Golf füss pronta da surpiglier la mited siand ch’els drouvan il veicul düraunt la sted. Per la vschinauncha da Zuoz importa la partecipaziun 30 pertschient vi dal import restant. Il cussagl decida da deliberer ün credit da cussagl sur da l’import necessari per cha’l veicul possa gnir cumpro.

Dumanda da sustegn finanziel La Diagonela: Il comitè d’organisaziun preschainta la situaziun e valütaziun zieva tschinch ans Diagonela. Il böt da ragiundscher 3000 partecipants nun es accumplieu, siand cha que drouva dapü temp cu previs. Tuottüna es La Diagonela zieva il Maraton Engiadinais l’evenimaint numer duos in Svizra cun bundant 1000 partecipants. La comunicaziun sur differents chanels, na l’ultim eir sur la televisiun, es fich impreschiunanta. Ils organisatuors faun la seguainta dumanda da sustegn finanziel: üna garanzia da deficit, üna contribuziun finanziela e prestaziuns in fuorma da lavur cun üna valur totela da 87’200 francs e que pels prossems tschinch ans per avair üna tscherta sgürezza da planisaziun. L’agir es coordino eir cullas otras vschinaunchas illa Plaiv e cun Puntraschigna e San Murezzan. Il cussagl es perinclet cul agir suot la resalva da la decisiun da la radunanza cumünela da preventiv.

Dumanda da sustegn finanziel giubileum Concours Hippique: Il comitè d’organisaziun ho inoltro üna dumanda da sustegn finanziel in connex cul 50evel giubileum, inua cha’d es previs ün act festiv in marculdi, ils 7 avuost, sün Plaz cun musica sün chavals, ün aperitiv ed ün sagl nouv. Il cussagl decida da surpiglier ils cuosts per la musica, per l’aperitiv e 50 pertschient dals cuosts pel sagl nouv.

Pulizia: Adattamaint reglamaint fös artificiels: Que ho do diversas reclamaziuns in connex cun ün fö artificiel la fin da marz giò’n Dorta. Il fö artificiel d’eira bainschi permiss ma ho fat üna canera sula ed ho sdasdo e spavento ad umauns e bes-chas. Per eviter in avegnir telas situaziuns decida il cussagl d’adatter il reglamaint existent e d’integrer la frasa cha’d es permiss da fer fös artificiels be fin tar la categoria 3, voul dir in fuorma pü modesta ed impustüt sainza elemaints chi tunan scu bombas. Il permiss per tels fös artificiels vegnan dos da la direcziun operativa. L’uffizi chantunel, ils hotels e restorants da Zuoz dessan gnir infurmos in quist sen.

Infurmaziuns our da tschantedas da cumischiuns: Giubileum 100 ans Lia Rumantscha: Ils organisatuors stöglian renunzcher sülla construcziun dal teater previs sün Plazzet e realiser il teater aint illa sela da gimnastica. Sün Plazzet dess gnir s-chaffieu ün lö d’incunter.

Cumischiun da turissem: L’inviern passo es sto fich allegraivel per tuots ed eir la sted chi vain imprometta ün svilup positiv. La cumischiun ho discus l’adöver dal nouv logo turistic (be siluetta Zuoz) e da l’administraziun (curuna e siluetta Engadin). La pagina d’internet zuoz.ch dess rester in possess da la vschinauncha, ma a dess gnir s-chaffieu üna pagina inua cha’l visitadur po tscherner traunter il cuntgnieu politic e turistic. La fermativa dal bus dal lö in Resgia nun ho cuntanto e dess darcho gnir spusto inavous inua cha’l d’eira. (cd)