Veröffentlicht: 5.05.2023

Neuigkeiten des Gemeinderates

Noviteds dal cussagl cumünel da Zuoz

In sias ultimas tschantedas ho il cussagl cumünel traunter oter tratto e decis sur dal seguaint:

Ingrandimaint Parkegi Centrel – surdeda lavuors progettaziun

Per cuntinuer cullas lavuors a reguard ün pussibel ingrandimaint dal Parkegi Centrel ho il cussagl cumünel decis dad invider dad offrir ün preproget, ün proget da fabrica ed üna calculaziun da cuosts. Que sülla basa dad üna varianta per l’ingrandimaint da 67+1 plazza ed üna cun 80+1 plazza. Zieva avair valüto las offertas decida il cussagl cumünel unanimamaing il seguaint: Perseguiteda vain la varianta cun 80+1 plazzas da parker e las lavuors vegnan surdedas a la ditta Pini Group.

Sunteri – proget sur elavuro

Il cussagl cumünel ho lascho sur elavurer il proget, chi cumpiglia uossa eir ils tschegns e giavüschs exprimieus illa radunanza cumünela. Previs sun totel 60 nouvas fossas per urnas in üna nouva paraid per rimplazzer las existentas. Impü es previs plazza per fossas dad urnas suotteraunas ed ün fossa cumöna. Las lavuors dessan gnir realisedas quist’an tenor preventiv. Cul preventiv 2024 as po alura piglier sü las ulteriuras lavuors e la finischun dal proget.

Adressamaint

Il cussagl cumünel es confrunto cun diversas remarchas e reclamaziuns a reguard las tevlinas per las chesas. Que zieva cha la radunanza dals vschins ho eir già manzuno cha la versiun actuela nu cuntainta. Il cussagl cumünel piglia incunter ils pissers da la populaziun a reguard las tevlinas e decida seguaint agir: La montascha da las tevlinas vain interruotta. Il cussagl cumünel as piglia il temp per elavurer e valüter ils tschegns e las idejas our da la populaziun e decida in üna prosma tschanteda sur da l‘agir.

Cunvegna collavuraziun cun S-chanf – decisiun intent politic per cuntinuaziun

La cunvegna da prestaziun traunter las vschinaunchas da Zuoz e S-chanf a reguard il forestel ed il servezzan tecnic scada a la fin dal 2023. Il cussagl cumünel decida unanimamaing da perseguiter la via currainta e da cuntinuer la collavuraziun culla vschinauncha da S-chanf a reguard forestel e servezzan tecnic. Quist collavuraziun exista daspö divers ans, ho i’ls ultims duos ans pudieu gnir optimeda e funcziuna bain sül livel operativ. Il cussagl cumünel es unanimamaing da l’avis cha que es la güsta via e sparescha cha quista clappa il sustegn necessari.

Tscherna pedagoga curativa

La plazza da pedagog curativ es gnida scritta oura zieva la desditta dad ün collavuratur curraint. Entredas sun duos annunzchas. Il cussagl cumünel tscherna zieva la vülütaziun unanimamaing a duonna Clarita Kunz scu pedagoga curativa a partir da l’an da scoula 2023/24. Sinceras gratulaziuns per la tscherna.

Engadin Tourismus AG a partir dal 2024

Zieva cha la vschinauncha da San Murezzan ho desdit la cunvegna culla Engadin St. Moritz AG dess la destinaziun a partir dal 2024 cuntinuer suot il nom Engadin Tourismus AG. Il cussagl cumünel ho in merit delibero ils statüts ed il contrat per la nouva societed dad aczias ed eir las cunvegnas da prestaziun per ils differents servezzans a maun da la radunanza cumünela dals 28 gün 2023.

Uffizi da fabrica

Zieva cha la gestiun dal uffizi da fabrica es sur bgers ans steda incumbenzeda a la ditta Geo Grischa do que ün müdamaint. A partir dals 1. lügl 2023 vain sar Daniel Fuchser impiego directamaing da la vschinauncha da Zuoz. Sar Daniel Fuchser maina l’uffizi da fabrica daspö bod 20 ans ed il cussagl cumünel es cuntaint da pudair cuntinuer la buna collavuraziun.

Download PDF
Alle amtlichen Anzeigen
A+
A-