Infurmaziuns per persunas gnidas notiers

Schlarigna maina üna scoula bilingua. Las duos linguas culs listess drets, rumauntsch (idiom putèr) e tudas-ch da scrittüra,  vegnan instruidas in nossa scoula davent da la scoulina e que cul böt cha’ls iffaunts saun in 9. classa tuottas duos linguas listess bain.

 

 

 

 

 

 

Cuors dal di

 

Tuot las classas haun ün urari individuel, chi cumainza al pü bod a las 7.40 e chi düra fin al pü tard a las 12.00 .  Al zievamezdi cumainza la scoula a las 14.00 e düra fin al pü tard a las 16.35 . Al marculdi zievamezdi haun tuots liber. Düraunt l’instrucziun e las posas vegnan ils iffaunts survaglios da la magistra u’l magister da classa. Ourdvart il temp da scoula sun ils genituors respunsabels per lur iffaunts.

 

Maisa da mezdi

 

La scoula primara da Schlarigna spordscha als iffaunts da scoulina fin in 6. classa üna survagliaunza sur mezdi (11.55 – 13.55), cumprais cul gianter. Il predsch per ün’united da survagliaunza importa fr. 15.- .

 

Lezchas

 

Las lezchas cumpiglian davent da la 1. classa üna part importanta da l’instrucziun. Ils genituors sun respunsabels cha quellas vegnan fattas.

 

Attestats

 

Las prestaziuns dals solars vegnan güdichedas üna vouta per semester da las magistras e’ls magisters da classa. Pels iffaunts da la 1. classa vain do giò a la  fin dal 1. e dal 2. semester ün rapport d’imprender. Il prüm  rapport d’imprender vain discus in ün discuors culs genituors in tuot las classas. Ils iffaunts da la 2. fin 6. classa clappan ün attestat da notas zieva il 1. ed eir zieva il 2. semester

Promoziun integrativa (PIN)La scoula d’hozindi es üna scoula cun varieted, perche ch’ella stu satisfer ad iffaunts cun differentas premissas e cun differents stedis da svilup,  premissas d’imprender, scu eir differentas situaziuns famiglieras e culturelas.  La persuna d’instrucziun illa classa regulera stu s’abiner per granda part cun quista heterogenited cun las differentas spüertas da l’instrucziun. La classa regulera es perque il  lö principel da  la promoziun.

 

L’instrucziun integrativa agiundscha e rimplazza l’instrucziun regulera in situaziuns, illas quêlas la spüerta da la classa regulera  nu riva a bröch cun  las pretaisas da scolaras u scolars chi surpassan ils cunfins e las pussibilteds e la capazited da la persuna d’instrucziun. Cò vegnan las magistras e’ls magisters sustgnieus da las pedagogas curativas da scoula (PCS). Que po esser tar iffaunts cun difficulteds in scoula, disturbis d’imprender, deblezzas parcielas ( disturbis da ler, scriver u in matematica), disturbis da cumportimaint u tar iffaunts surdottos.

 

Müdeda in scoulas superiuras

Ils iffaunts da scoulina fin in 6. classa vaun a scoula a Schlarigna. Zieva la 6. classa müdane illa scoula superiura a Samedan. In 6. classa haun ils iffaunts la pussibilted da fer l’examen pel gimnasi.

 

Assimilaziun

 

L’instrucziun d’assimilaziun vain visiteda d’iffaunts chi nu saun las linguas da scoula rumauntsch e tudas-ch. Quist instrucziun es reglementeda illa ledscha e’l temp d’instrucziun es limito.

Üsaunzas

Scu in otras culturas ho eir Schlarigna sias üsaunzas. Obligatorias per scolaras e scolars sun il chanter suot las fnestras (24.12) e’l Chalandamarz  (01.03.). Quistas duos üsaunzas haun per consequenza cha que do eir prouvas da chaunt.

Contacts

Tar problems scolastics: Per plaschair contacter al prüm la persuna d’instrucziun da la classa.

 

 

Tar dumandas da scoula:
Claudia Pollini, Mnedra da Scoula Celerina/Schlarigna
T+41 81 833 18 01
Andrea Fanconi, Schulratspräsident
T +41 78 789 97 62

Tar dumandas generelas:

Cumün Celerina/Schlarigna
T +41 81 837 36 80
Öffnungszeiten:
09.00 – 11.30 und 14.30 – 17.00

A+
A-