Abiter

Minz istoric e chesas engiadinaisas modernas

Zuoz ho ca. 1'300 abitants ed üna surfatscha da 6'600 ha, da quella sun 600 ha god. La vschinauncha quinta circa 1'400 abitaziuns, circa 600 sun abitedas dad indigens. Las otras abitazuns sun abitaziuns da vacanzas explotedas (ca. 10%) ed abitaziuns secundarias (ca. 50%). Intaunt cha que do bellas chesas istoricas i'l minz da la vschinauncha, as chatta in otres quartiers eir chesas engiadinaisas fich modernas e confortablas.

Cumprer e piglier a fit

Il marcho d’immobiglias local vain caracteriso dal ferm interess da Svizzers ed esters chi vöglian cumprer ün’immobiglia. Per l’acquist d’immobiglias tres persunas da l’ester velan in Svizra prescripziuns specielas. Sainza il permiss da domicil stu üna tela cumpra per regla gnir appruveda specielmaing da las autoriteds.

Pervi da la granda dumanda, impustüt per fittaunzas per üna stagiun, vain arcumando da cumanzer ad uras a tschercher ün’abitaziun.

Glista abitaziuns da fitter libras

Per plaschair clicker cò per telecharger la glista cun abitaziuns da fitter libras.

Contuorns

Zuoz: Bijou da l'Engiadin'Ota

Zuoz es be 20 minuts davent da San Murezzan e per bgers la pü bella vschinauncha da la destinaziun Engadin St. Moritz. Zieva la fin dal temp da glatsch s'ho avierta sün 1'800 m s.m. üna val ota da ca. 80 kilometers lungezza chi quinta tar las pü otas vals abitedas da tuot l'Europa. Düraunt bgers tschientiners d'eira la val be accessibla sur ils pass e la marchanzia gniva transpurteda cun müls e chavals sün sendas strettas. Daspö la renovaziun da las vias dals pass, la fabrica da la Viafier Retica e dal Bernina Express chi fuorma la colliaziun cun la Vuclina, es l'Engiadina avierta per tuot il muond.

«Chüna da tuot ils suns d'argient...»

Ultra dal Morteratsch, il vadret il pü imposant da las Alps da l'ost, e l'unica muntagna da passa quattermilli meters d'otezza da las Alps da l'ost, il Piz Bernina, as rechatta in Engiadina eir la funtauna da l'En chi ho apparaintamaing do il nom a la val. In lingua rumauntscha significha il nom Engiadina (Engadin) l'üert da l'En. Ün üert chi's preschainta als peis dal massiv dal Bernina cun sias muntagnas d'ün'otezza da trajamilli meters ed as rechatta in vicinanza dal Parc Naziunel cun gods da larsch e dschember genuins e vela scu s-chazi botanic chi ho in media sulagl düraunt 322 dis l'an. La funtauna da l'En as rechatta sün 2'484 m s.m. spel Lej da Lunghin (in vicinanza da Malögia).

Ils gös fascinants da la glüsch haun lascho crajer a Nietzsche d'avair chatto la "chüna da tuot ils suns d'argient"... Saja que sportists u gourmets, nes fins u filosofs - minch'an es l'Engiadina il böt per visitaduors da tuot il muond. Co paun els giodair üna granda spüerta da sports ed occupaziuns pel temp liber, specialiteds da la chadafö indigena, la cultura extraordinaria e l'architectura, numerusas occurrenzas scu eir il lifestyle chi pulsescha a San Murezzan d'üna vart e la quietezza e la recreaziun da l'otra vart. L'Engiadina es unica in sia varieted, unica illas Alps e perque suvenz gnida premieda.

Tuot las infurmaziuns da la regiun da vacanzas Engadin St. Moritz: www.engadin.ch

Regiuns cunfinantas:

www.scuol.ch
www.valposchiavo.ch
www.bregaglia.ch

Sgürezza e immundizchas / reciclagi

Sgürezza

Scu tuot la Svizra ho eir Zuoz üna da las pü bassas ratas da criminalited insomma. La pulizia es integreda fermamaing e dastrusch a la populaziun. Que pussibilitescha ün bun barat persunel e do ün bun sentimaint da sgürezza illa cumünaunza.

Immundizchas / reciclagi

Sadellas d’immundizchas sun scumpartidas sün l’inter territori cumünel. Per las immundizchas da las economias vegnan druvos sachs d’immundizchas speciels, in lur predsch es già cumpraisa la taxa d’alluntanamaint. Quists sachs cotschens da la ABVO sun vnels in tuot las butias da mangiativas. Duos voutas l’eivna vegnan alluntanedas las immundizchas da las economias tals lös da ramasser. Chartun, palperi, vaider, büschmainta veglia e tola paun gnir alluntanos tal lö da ramasser in staziun. Impü paun gnir depuonos vanzets tals lös da ramassamaint Via Nouva, San Bastiaun e tar la Stalla Casty in Pundschermaun.

Infurmaziuns a reguard l'alluntanamaint d'immundizchas illa vschinauncha da Zuoz 2023

Fögl d'infurmaziun immundizchas d'üert


Provedimaint d'ova da baiver

Infurmaziuns davart la qualitet da l’ova da baiver - prouva dals 22.12.2023

Integraziun

Post specialiso per l'integraziun dal Grischun
Engadinstrasse 24
CH-7001 Chur
+41 81 257 26 38
info@integration.gr.ch 
www.gr.ch

Sün quista homepage www.hallo.gr.ch as chatta ulteriuras infurmaziuns per persunas nouvarrivedas in differentas linguas.

 

A+
A-