arcumander quista paginaemailFacebookTwitter

Decisiuns dal cussagl cumünel favrer 2019

In occasiun da sias tschantedas düraunt il mais da favrer 2019 ho il cussagl cumünel da Zuoz traunter oter decis il seguaint:

Fabricas

  • Ferrari Umbau und Renovationen AG, Zuoz: per l’ingrandimaint da l’indriz per laver autos, Resgia
  • Michaela e Thilo Sauer-Bürger, Zuoz: divers müdamaints dal proget, Mariöl
  • Dmura AG, Zuoz: divers müdamaints vi dal proget Chesa Bellaria, Chöntschet
  • Andri Casty, Zuoz: dumanda BAB per la construcziun d’üna nouva remisa cun stalla per gillinas, Pundschermaun

Administraziun cumünela Siand cha duonna Piera Robbi vo in pensiun ils 31 marz 2019 es da regler la successiun. Scu successura tscherna il cussagl a duonna Maria Olinda Monteiro, chi lavura daspö dal 2012 per la vschinauncha. Sieu pensum dad hoz 40% dess gnir augmanto sün 80% per evader las lavuors insembel cul custodi Lotar Robbi.


La giarsuna Milena Pavanello vuless gugent agiundscher la maturited professiunela zieva cha sieu giarsunedi terminescha ils 31 lügl 2020, e que per ün an cun ün pensum da lavur da 30%. Il cussagl es perinclet cul agir. Al glistess mumaint dess però eir darcho gnir impiego ün/a nouv/a giarsun/a pel giarsunedi da commerzi süls 1. avuost 2020.

Cul impieghi da sar Thomas Pinchera scu nouv mneder tecnic as haun müdo eir las lezchas e pretaisas invers quista funcziun. Dapü progets tecnics dumandan cha las respunsabiliteds illa gruppa da lavur vegnan organisedas da nouv. Our da quel motiv promouva il cussagl a sar Otto Gian Sonder süls 1. marz 2019 scu prüm lavuraint. Siand ch’el d’eira adüna già il rimplazzant dal mneder tecnic as voul uossa regler quista funcziun ufficielmaing eir scu sen d’arcugnuschentscha per la buna lavur prasteda.

Program evenimaints da sted 2019
Il cussagl piglia cognit d‘üna survista sur da tuot ils evenimaints da quista sted. Ün program chi sto suot la glüsch dal giubileum da 100 ans Lia Rumantscha e 50 ans Concours Hippique. Il discuors da Zuoz ho lö in venderdi ils 26 lügl, cun ün tema collio a la lingua rumauntscha. Scu oratur pel discuors dals 1. Avuost as ho pudieu guadagner a sar regent Jon Domenic Parolini. Zieva segua il program festiv da la Lia Rumantscha culla festa d’anniversari in sanda ils 17 avuost chi vain organiseda insembel cullas societeds da Zuoz (invezza da Zuoz in festa in lügl). Ulteriurs detagls sur dal program dal giubileum as chatta suot: www.100onns.ch. La festa d’alp ho lö in dumengia ils 4 avuost sün Arpiglia.

Infurmaziuns our da tschantedas da cumischiuns

Cumischiun da planisaziun: L’indschegner incumbenzo valütescha las schanzas pü grandas scu 50% da pudair spuster la zona cotschna sün Purtum e cha la lingia possa gnir spusteda vers vest, que chi gniss incunter ad ün futur proget per ün hotel in Purtum. In vista da la valur dal terrain in Purtum decida il cussagl da vulair incumbenzer il büro Geoformer cull’elavuraziun dal cunter-stüdi.

Zuoz, 27 meg 2019

inavous