arcumander quista paginaemailFacebookTwitter

Decisiuns dal cussagl cumünel avuost 2018

In occasiun da sias tschantedas düraunt il mais d’avuost 2018 ho il cussagl cumünel da Zuoz traunter oter decis il seguaint:

Fabricas

  • Egidio Gavazzi, Milano: per l’ingrandimaint da la stüva, Chesa Marianna, Dimvih d’Aguêl
  • Paolo Gualtieri, Milano: per la cumbinaziun da las abitaziuns 1 e 3, Chesa Rudè
  • Milena Feuerstein, Zuoz: sanaziun tet Acla Viroula – procedura BAB
  • Markus Mende, Zuoz: per il plazzamaint d’üna sculptura d’art aint il üert da la Chesa Büsin

Commerzi e misteraunza, turissem
Proposta finanziaziun evenimaints regiunels 2019+

Il cussagl tratta la proposta chi’d es gnida fatta davart da San Murezzan a la conferenza dals presidents da l’Engiadin’Ota e chi ho do andit ad üna discussiun fich vasta. Scu cha d’eira da spetter es gnieu miss ün grand pais sün evenimaints da San Murezzan. L’organisaziun turistica ESTM AG ho defino trais puncts importants per la valütaziun dals evenimaints ed intunescha cha la decisiun che evenimaints resp. che temas chi dessan gnir comunichos da la destinaziun nu dess esser üna decisiun politica, ma turistica. Il cussagl es da l’avis cha’ls evenimaints culturels dessan gnir valütos e finanzios da la cumischiun da cultura. Zieva üna discussiun animeda decida il cussagl da vulair sustegner il model da finanziaziun, chi chaschunescha cuosts da ca. frs. 28‘350.00 per Zuoz, ma da pretender cha La Diagonela e’l Concours da Zuoz vegnan resguardos. Ils presidents da la Plaiv e la Regiun vegnan infurmos in quist sen.

Trafic public
Decisiun a reguard finanziaziun trafic public Engiadin’Ota

La prüma part pertuocha las subvenziuns dals abunamaints annuels per giasts d’abitaziuns secundarias, inua cha Zuoz ho implemento già daspö divers ans ün sistem chi funcziuna e chi vain stimo dals giasts. L’otra part pertuocha la finanziaziun dal trafic public in Engiadin’Ota chi stu gnir reglo da nouv, siand cha las pendiculeras imnatschan da na pü vulair pajer lur contribuziun (frs. 440‘000.00) e perche cha la Stadtbus Chur nu po pü pajer lur contribuziun da frs. 160‘000.00 our da motivs giuridics. Las pendiculeras sun però prontas da pajer inavaunt lur contribuziun, scha tuot las vschinaunchas installeschan ün sistem da subvenziun dals abunamaints annuels per giasts d’abitaziuns secundarias. Per Zuoz dess que cun quista soluziun cuosts impü da frs. 9‘000.00 per la finanziaziun dal trafic public. Il cussagl es perinclet d’integrer quista cifra aint il preventiv 2019, suot la cundiziun cha’l trafic public vain optimo. Que voul dir cha la lingia 7 (Plaiv) stu gnir abolida e rimplazzeda cun ün nouv sistem illa Plaiv ed a Zuoz. Lingias chi servan unicamaing als skiunzs (Puntraschigna-Lagalb e Silvaplauna-Corvatsch) dessan in avegnir gnir finanziedas da las pendiculeras.

Trafic public Engiadin’Ota: agir a reguard submissiun
La delegeda dal trafic public OE ho stuvieu decider scu agir a reguard la submissiun da la spüerta cumplessiva in avegnir. Siand cha’ls contrats existents scadan sün divers termins ho la delegeda decis da scriver our tuot la spüerta sün l’an 2024 cura cha l’ultim contrat scada. La lingia 7 dal Engadin Bus dess gnir surlavureda cumplettamaing per optimer la spüerta, eir in pigliand in vista cha la Viafier Retica prevezza da moderniser ed ingrandir la staziun da Zuoz.

Vias, punts ed ovas
Provedimaint electric parcella 2733 Curtinellas

Per terminer e moderniser l’installaziun dal provedimaint electric e per monter duos nouvas lampas ho la Repower inoltro ün’offerta a la vschinauncha. Quista es gnida revaisa da sar indschegner Peter L. Plebani chi maina il proget da la sanaziun da la via Curtinellas. L‘offerta nu fo però part dal proget cumplessiv, siand cha’ls bsögns as haun sviluppos zieva cha’l proget d’eira gnieu elavuro dal 2016. Zieva avair survgnieu las spiegaziuns vulidas decida il cussagl da deliberer ün credit da frs. 50‘000.00 per cha las lavuors possan gnir fattas dalum.

Decisiun a reguard publicaziun parkegis Tuor/Plaz
A nu sun entros üngüns recuors sülla publicaziun a reguard las nouvas tariffas süls parkegis Tuor e Plaz. Il cussagl decida da publicher la decisiun aint il fögl ufficiel chantunel per 30 dis. Scha nun aintran otramaing recuors paun las nouvas tariffas gnir missas in vigur.

Organisaziun da vschinauncha
Discussiun revaisa constituziun cumünela

Il cussagl discuta ils motivs chi haun do andit a la tematica dad eventuelmaing vulair fer üna revaisa da la constituziun cumünela. Siand cha sar cusglier Gian Rudolf Caprez stu banduner il cussagl causa limitaziun d’uffizi e sar cusglier Thomas Pinchera müda sül s-chelin operativ scu nouv mneder tecnic, füss da rimplazzer duos cusgliers süllas prosmas tschernas da Chalandamarz 2019. La dumanda es scha que nu füss il dret mumaint per redür il cussagl da 7 sün 5 commembers. Scha que es ün tema, schi stu l’affer gnir suottamiss a la radunanza cumünela in november 2018. Cun 7 cusgliers do que minch’an üna tscherna e las opiniuns da la populaziun sun rapreschantedas in möd pü vast. Cun 5 cusgliers as po optimer la scumpartiziun dals decasteris, as dvainta pü svelt in piglier decisiuns ed i dvainta pü simpel a chatter candidats. A segua üna discussiun inua cha mincha cusglier as exprima sur da sieu managiamaint. Il tenor es quel cha la situaziun actuela cun 7 cusgliers es ideela siand cha la discussiun es pü vasta e las lezchas sun scumpartidas sün püssas spedlas, siand cha’l temp disponibel es eir ün tema da na suotvalüter. Da l’otra vart vain eir discuto la tematica da separer auncha meglder la lavur strategica e quella operativa, siand ch‘ün model d’üna direcziun operativa vain praticho eir in otras vschinaunchas cun success. Illa votumaziun decida il cussagl da rester sül model actuel e da na fer ulteriurs sclarimaints in chosa.

Infurmaziuns our da tschantedas da cumischiuns

Stallas da Zuoz: a dess gnir organiso ün inscunter culs purs pertuchos ed interessos per discuter sur d’eventuels barats da terrain per pudair chatter soluziuns pratichablas.

Giuventüna: il local sü Purtum ho do andit a reclamaziuns e discussiuns, siand cha regna ün grand dischuorden e cha vain consümo alcohol e cigarettas, e que in üna zona inua cha eir oters iffaunts e giuvenils traficheschan. A la Giuventüna vain do ün termin fin als 31 december 2018 per tegner in uorden il local, uschigliö vain quel serro e la Giuventüna stu guarder svess per ün’otra soluziun.

Cussagl da scoula: l’an scolastic ho cumanzo bain. Tar la maisa da mezdi ho que in mardi memma bgeras annunzchas uschè cha’l cussagl da scoula ho decis d’ingascher a la magistra Flavia Rudigier per la survagliaunza, chi riva da cumbiner quista lezcha güsta cun lecziuns d’agüd in rumauntsch.

Sunteri e stand da tir Suotarivas: las lavuors da sanaziun sun inviedas.

Zuoz, 10 settember 2018/cd

inavous