arcumander quista paginaemailFacebookTwitter

Decisiuns dal cussagl cumünel gün 2019

In occasiun da sias tschantedas düraunt il mais da gün 2019 ho il cussagl cumünel da Zuoz traunter oter decis il seguaint:

Fabricas

  • Pravenda catolica La Plaiv Suot Funtauna Merla, Zuoz: per la renovaziun ed ingrandimaint da la chesa pravenda catolica, chesa nr. 52 Aguêl
  • Banca Chantunela Grischuna, Zuoz: per la sanaziun dal tet ed integraziun d’ün’abitaziun sül plaun suot, chesa nr. 35A Via Maistra
  • Egidio Gavazzi, Milano: per l’alluntanamaint dal chesin d’immundizchas, Via Dimvih d’Aguêl
  • Ferrari Umbau und Renovationen AG, Zuoz: permiss excepziunel per la construcziun d’ün tet plat, indriz per laver autos, Resgia
  • Marianne Sonder-Lüssi e Peter Lüssi, Habsburg: per la sanaziun d’ün’abitaziun e dal tet incl. duos nouvas lucarnas, chesa nr. 169
  • Kirikan AG, Zuoz: per la construcziun dal tract d’immez, Curtinellas
  • Johannes Cordett, Zuoz: per pudair transfurmer üna fnestra in üna porta, San Bastiaun
  • STWEG Chesa Stoppany, Zuoz: per la sanaziun dal tet, San Bastiaun
  • SSZ AG Zuoz: dumanda per inoltrer ün BAB als uffizis chantunels in connex cull’inaivaziun da la pista cotschna e da la traversa sün Albanas

Administraziun cumünela
Tscherna d’ün nouv mneder da l’administraziun cumünela

Ils candidats sun gnieus valütos da la cumischiun da persunel e gnieus invidos ad ün discuors persunel. La cumischiun da persunel propuona da tscherner a Patrick Steger da Zuoz scu nouv mneder da l’administraziun cumünela. Il cussagl tscherna e gratulescha a Patrick Steger per la tscherna onuraivla e s’allegra sün üna buna collavuraziun.

Tscherna d’ün nouv giarsun süls 1. avuost 2020
Flurin Bott da S-chanf as vaiva annunzcho per la plazza da giarsunedi ed es eir sto a fer ün pêr dis da prouva ill’administraziun. Il cussagl tscherna a Flurin Bott scu nouv giarsun da commerzi cun profil E süls 1. avuost 2020.

Vias, punts ed ovas
Soluziun parkegi Chastlatsch

Üna cunvegna regla d’üna vart l’agir in connex cul mür suot la Via Maistra, chi po gnir implieu sü per stabiliser il mür e da l’otra vart l’access per la garascha da las chesas in Curtin Plavaunt tres il parkegi Chastlatsch. Previs es cha la via d’access vain catrameda e cha’ls parkegis vegnan implieus aint cun materiel da reciclagi. Las lavuors dessan gnir fattas in utuon.

Turissem
Dumanda Nationalpark Bike-Marathon: stricha alternativa, territori Zuoz

Il comitè d’organisaziun dal Nationalpark Bike-Marathon ho inoltro üna dumanda per ün permiss eventuel in connex culla s-chaffida d’üna stricha alternativa in cas da naiv sül pass Chaschauna. La stricha passa sün territori da Zuoz (Val Gianduns, Curtinellas, Resgia) e tuorna a S-chanf. Il cussagl es perinclet da relascher il permiss giavüscho suot las cundiziuns cha scha la stricha passa sün terrains da privats cha’l comitè stu procurer ils permiss da tels, cha la stricha vain signaliseda il meglder pussibel per eviter accidaints e cha la vschinauncha vain orienteda a temp ütil scha la stricha vain missa in vigur causa noschas previsiuns da l’ora.

Cunvegna da prestaziun ESTM AG

In connex culla cunvegna da prestaziun chi regla l’andamaint da la gestiun dal post d’infurmaziun illa staziun da Zuoz es da comunicher fin als 30 gün 2019 l’agir in futur a reguard la prolungiaziun da la collavuraziun. Zuoz restaro eir in avegnir ün punct principel da la destinaziun, ma eir da la Viafier Retica, insembel culla spüerta da l’agentura da la Posta. Siand cha la collavuraziun funcziuna fich bain decida il cussagl da prolunger la cunvegna da prestaziun.

Infurmaziuns our da tschantedas da cumischiuns

Tribüna Concours: a d’eira previs ün import da frs. 50‘000.00 aint il preventiv per pudair rimplazzer la tribüna dal Concours, scu regal d’anniversari per quist evenimaint. Intaunt haun las offertas demusso cha’ls cuosts per üna sanaziun totela s’amuntan sün bundant frs. 110'000.00. Il cussagl decida da lascher fer üna sanaziun punctuela e da surder las lavuors a la firma Salzgeber, chi vaiva eir fat l’offerta pü favuraivla pel rimplazzamaint da la tribüna.

Imbellimaint pressa da chartun in Staziun: l’inscunter da giuvenils suot la bachetta da sar Fredy Bär prevezzan d’imbellir la pressa da chartun in Staziun.

Dans d’infrastrucura: l’ovaziun dal Ovel da Quatter Lains la not dals 11 gün 2019 ho purto davent la punt Bos-chetta, chi stu dimena gnir refatta. Las offertas dals impressaris prevezzan ün tet da cuost da frs. 50‘000.00. Il cussagl deliberescha quist import scu credit da cussagl in ögl da la necessited da refacziun da quista punt.

Varia
Las scoulas da la primara e da la Plaiv as haun missas a disposiziun per praster ün di da lavur cumöna in Purschigl ed in Val Urezza per fer uorden süls pasculs dals grands dans tres las lavinas.

Aint ils gods, süllas sendas e vias d’alp as ho stuvieu constater grands dans tres las lavinas ed ils vents ferms. Que pudess esser cha’l mantegnimaint chaschuna cuosts bainquaunt pü ots scu previs aint il preventiv.

01.07.2019/cd

inavous