arcumander quista paginaemailFacebookTwitter

Decisiuns dal cussagl cumünel settember 2018

In occasiun da sias tschantedas düraunt il mais da settember 2018 ho il cussagl cumünel da Zuoz traunter oter decis il seguaint:

Fabricas

  • Kirikan AG Schlarigna: müdamaint vi dal proget da la garascha in Curtinellas
  • SSZ AG Zuoz: dumanda BAB per fer adöver dal chamannin dal vegl runel Albanas scu suosta per lavuraints, invier procedura BAB
  • SSZ AG, Zuoz: dumanda BAB per fer adöver da la staziun da munt dal runel Albanas scu remisa per materiel, invier procedura BAB
  • Vschinaunchas da Zuoz e da S-chanf: permiss BAB per la lingia d’innaivamaint traunter las duos vschinaunchas, lung la lingia d’ova existenta
  • Per-Anders Benthin, Pfäffikon: müdamaint da proget, Chesa Pitschna, Frunts
  • Christian Schoch, Bertschikon: sanaziun dal tet e da la fatscheda, Chesa Sper l’Ovel, Survih
  • Ruedi Hess, Laupen: per l’integraziun d’üna fnestra da tet, Chesa Chaunt da Crusch
  • Carolin, Silvano & Peter L. Plebani, Zuoz: per la construcziun d’üna nouva chesa d’abiter cun garascha, Chavazzaglias

Planisaziun dal lö
Revisiun parziela „Gewässerräume“: examinaziun preliminera tres l’uffizi ARE
Davart dal büro da planiseders STW sun gnieus elavuros scu previs ils plans chi daun üna survista sur dals ovels e flüms sül territori da Zuoz. La cumischiun da planisaziun ho tratto la fatschenda in duos tschantedas e fat adattamaints, inua pussibel. La documainta dess uossa gnir invieda al ARE per üna examinaziun preliminera.

Commerzi e misteraunza, turissem
Dumandas da sustegn finanziel

Il Maraton da skis Engiadinais dumanda per ün sustegn finanziel siand cha la situaziun da sponsoring dvainta adüna pü difficila. Our da quel motiv dumanda l’organisaziun a tuot las vschinaunchas da la Regiun per üna contribuziun tenor clev da scumpartimaint e que per üna düreda da trais ans. Zieva cuorta discussiun decida il cussagl da stipuler üna garanzia da deficit da frs. 10‘000.00 culla pussibilited da metter in quint già ouravaunt ün tschert import, scha que es necessari our da motivs da liquidited (model Diagonela). Inavaunt decida il cussagl da respuonder in sen positiv a la dumanda da pudair druver la via veglia chantunela traunter Zuoz e S-chanf scu parkegi per giasts dal evenimaint. Que suot las resalvas cha la via resta transibla in sens unic ed in pigliand resguard sülla situaziun da prievel da lavinas.

Ils organisatuors dal Engadin Art Talks, chi ho lö la fin da schner 2019 a Zuoz ed es dvanto intaunt ün evenimaint important i’l muond da la cultura moderna, ho inoltro üna dumanda da sustegn. Il cussagl decida da stipuler üna garanzia da deficit ill’otezza da frs. 10‘000.00 e da contribuir prestaziuns da lavur e materiel, fit da la sela etc. ill’otezza da frs. 5‘000.00.

Collavuraziun regiunela
Proget regiunel halla da glatsch, praisa da pusiziun

Il cussagl discuta il stüdi e repassa proget per proget. Intaunt es il stüdi gnieu cumpletto cul proget Lyceum Zuoz scu ulteriura varianta. Ils presidents cumünels da la Plaiv haun fingià defino las prioriteds dals singuls progets. Scha la votumaziun dals 10 favrer 2019 ho ün esit positiv schi dessan gnir perseguitos cun priorited 1 ils seguaints progets: Lyceum Zuoz, Serlas Ost S-chanf, ARA Staz Schlarigna, Signal San Murezzan, Pitent Samedan. Il cussagl es perinclet culla priorisaziun dals progets e decida da comunicher in quist sen a la Regiun.

Organisaziun da vschinauncha
Decisiun a reguard agir concept Zuoz 2025

Il cussagl discuta l’offerta da la firma Quant AG da Flem chi propuona ün proget strategic, chi’s basescha sül proget Zuoz 2020. In üna prüma fasa elavurescha üna gruppa cul president, vice-president e’l chanzlist ils fats actuels per zieva stipuler in üna seguonda fasa ils böts strategics, inua cha vegnan integredas las opiniuns dal cussagl e dad oters pertuchos. Ils cusglieders modereschan la dietta da cussagl chi ho lö ils 12 e 13 november 2018 e chi serva scu principi per quist proget strategic. Ad es important da prioriser ils progets tenor consequenzas finanzielas e‘ls böts haun da gnir coordinos culs resultats our dal stüdi „Kommunales Räumliches Leitbild KRL“ chi’d es in elavuraziun. Zieva üna cuorta discussiun sur da la metodica e l’agir decida il cussagl d’invier quist proget, cul böt da pudair suottametter illa radunanza cumünela in gün 2019 ün resultat concret. La populaziun dess gnir orienteda i’l cuors da l’inviern cun ün’occurrenza d‘infurmaziun ed avair la pussibilited da’s parteciper davart il proget a maun d’üna cooperaziun publica.

Infurmaziuns our da tschantedas da cumischiuns
Roth Gerüste: ils respunsabels da la Roth Gerüste haun preschanto lur plan da lavur chi prevezza cha vain cumanzo cul fabricat da la halla in Curtinellas al cumanzamaint d’october 2018.

Presidents Plaiv: ils presidents da la Plaiv haun discuto l’andamaint a reguard l’informatica illa scoula Plaiv e pretendan ün mneder da proget professiunel per cha’l proget possa gnir realiso düraunt ils prossems 12 fin 18 mais. Ün inscunter traunter ils presidents e’ls delegios da la scoula dess avair lö in november.

Entreda Ost/Aguêl: la firma WALO infurmescha ch’ella nu riva pü da fer quista lavur in utuon scu previs e giavüscha da pudair spuster tela sülla prümavaira 2019. Il cussagl es perinclet cul agir. Ils cuosts sun da spuster aint il preventiv 2019.

Parkegi Chastlatsch: La naiv po gnir depositeda eir l’inviern chi vain sülla parcella 2986 da la Blaisun AG, ma la vschinauncha stu pisserer chi nu do üngüns dans d’ova. Our da quel motiv decida il cussagl da lascher fer ün tombin (Sickergrube) chi maina davent l’ova da prümavaira e deliberescha il credit necessari. Inavaunt giavüscha il cussagl da lascher elavurer ün pitschen proget per amegldrer l’access dal parkegi sün via cun üna s-chela, siand cha la situaziun actuela cul chaunt existent nu cuntainta brichafat. E scu terz punct es da chatter üna soluziun a reguard l’access da la garascha da las chesas Curtin Plavaunt. Tenor plan da quartier stu quella gnir realiseda tres il parkegi Chastlatsch. Il cussagl es da l’avis cha la varianta actuela lung l’ur dal parkegi es per tuot ils pertuchos la situaziun pü optimela. A dessan gnir fat ulteriurs sclarimaints in chosa.

Chesa da scoula primara: la firma Salzmann da Zuoz ho inoltro ün‘offerta per sgürer il tet da la chesa da scoula cunter craps chi pudessan cruder giò. Il cussagl es perinclet da surder l’incumbenza tenor offerta e deliberescha il credit bsögnaivel. Las lavuors vegnan fattas düraunt las vacanzas d’october 2018.

Zuoz 2020: il cussagl piglia cugnuschentscha cun grand plaschair cha sar Albert Gaudenz es pront eir quist an d’organiser darcho il Tavulin Rumauntsch, chi cumainza ils 29 october 2018 e vo fin als 17 december 2018, adüna in lündeschdi da las 18:00 fin las 19:00.

Zuoz, 1. october 2018/cd

inavous