arcumander quista paginaemailFacebookTwitter

Decisiuns dal cussagl november 2018

In occasiun da sias tschantedas düraunt il mais da november 2018 ho il cussagl cumünel da Zuoz traunter oter decis il seguaint:

Fabricas

  • Andri Casty, Zuoz: per la construcziun d’üna stalla per gillinas cun remisa, Pundschermaun, deliberaziun BAB

Educaziun e cultura
Tscherna magistra primara

Il cussagl da scoula suottametta la proposta da tscherner a duonna Fabienne Grigoli scu nouva magistra primara cun ün pensum dad 80% sül nouv an da scoula 2019/2020. Ella rimplazza a duonna Rebecca Brütsch chi ho do desditta. Il cussagl ho gust cha duonna Fabienne tuorna a Zuoz e la tscherna scu nouva magistra primara tenor proposta dal cussagl da scoula.

Impostas
Praisa da pusiziun „Steuervorlage 17“

Il chantun ed il stedi lavuran parallel vi d’üna revaisa da la ledscha d’impostas per persunas giuridicas cul böt d’egualiser telas. Suot il strich do que per las vschinaunchas però pü pochas entredas, eir scha paun in avegnir stipuler svess il pè d’impostas per persunas giuridicas. Our da quel motiv ho l’associaziun chantunela dals büros d’impostas stipulo üna praisa da pusiziun chi vain preschanteda al cussagl. Il cussagl es da l’avis da sustegner tela pusiziun e d’inoltrer üna praisa da pusiziun as basand sün quella da l’associaziun chantunela.

Pulizia
Agir analisa da prievel vschinaunchas Zuoz e S-chanf

Per invier ils prossems pass in connex cun l’analisa da prievels, chi stu gnir realiseda tenor l’uffizi da pulizia e defaisa civila fin dal 2020, es d’invider a trais uffizis d’indschegneria per inoltrer offertas per quista lavur. Dalum cha las offertas sun avaunt maun vegnan quellas valütedas da l‘uffizi, chi fo alura ün’arcumandaziun a maun da las vschinaunchas.

Infurmaziuns our da tschantedas da cumischiuns

Cumischiun da turissem: la cumischiun ho tratto la dumanda a reguard ils uraris dal fnestrigl da l’infurmaziun turistica, da la retica e da la posta in staziun. Las statisticas demuossan cha traunter las 13:00 e las 14:00 sun las frequenzas fich bassas. La cumischiun propuona da cumanzer düraunt la stagiun ota pür las 13:30. Il cussagl es perinclet cul agir.

Zuoz, 27 november 2018/cd

inavous