arcumander quista paginaemailFacebookTwitter

Decisiuns dal cussagl settember ed october 2019

In occasiun da sias tschantedas düraunt ils mais settember ed october 2019 ho il cussagl cumünel da Zuoz traunter oter decis il seguaint:

Fabricas
Il cussagl cumünel ho relascho ils seguaints permiss da fabrica:

  • Jachen Könz, Lugano: transmissiun usufrüt abitaziun primaria sün condomini, Chesa Mariöl 6
  • Giachem Bott, Zuoz: Sanaziun dal tet Chesa Nr. 141
  • Quality of Life Ltd., fabrica hotel cun garascha süllas parcellas 2966 e 1717 – dumanda supplementera per üna pumpa da chalur cun sondas da terrain

Plazza da scoula
Zieva avair decis l’agir sün plazza da scoula in avuost pel temp fin tar las vacanzas d’utuon ho il cussagl discus sur dal agir sur l’inviern. La plazza vain refatta provisoricamaing sur inviern e per Chalandamarz. Per l’an chi vain es previs dad installer darcho l’üert culs s-chabels cha la vschinauncha es steda pussibla da surpiglier da la Lia Rumantscha.

Zona d’inscunter i’l minz da la vschinauncha

Il president orientescha cha la procedura per installer üna zona d’inscunter es invieda. Que as stu fer quint fin ad ün an fin cha’s po installer üna tela zona. Üna part da la procedura es ün’expertisa d’ün uffizi neutrel. Il cussagl sparescha da pudair introdür la zona d’inscunter sün l’inviern 2020/21.

Proget cudesch da Piz digitel

Il president declera la dumanda da l’agentura SKIPP chi voul metter sü per il proget „150 ans“ dal 2020 da la Banca Chantunela sün 150 piz i’l Chantun Grischun ün cudesch da Piz digitel. A Zuoz vain dumando da metter uschè ün‘installaziun sül Piz Kesch, Piz Belvair e Piz Blaisun. Zieva cuorta discussiun decida il cussagl our da motivs da frequenza da lascher metter sü ils cudeschs da Piz digitels sül Kesch, Belvair, Arpiglia e Blaisun.

Discussiun nomenclatura Plaz
Il president orientescha sur d’ün inscunter cun divers abitants da Zuoz chi reclaman sur dal nom „Plazzet“ per la plazza da scoula e la dumanda da müder sül nom „Plaz“. Il cussagl es dal listess avis e decida d‘invier l’adataziun dal nom i’l ram da la revisiun uffiziela da müdamaint d’adressas chi sto davaunt porta. Davent dals 1. Schner 2020 do que darcho be „Plaz“ a Zuoz. Inavaunt orientescha il president sur da la simila situaziun culs noms Ritscha e Dimvih d’Aguêl. Il cussagl es unanimamaing perinclet cul agir.

Imsüraziun uffiziela

Ad haun da gnir adresso intuorn tuot las chesas in cumün ed eir per part vias chi nu sun auncha nomnedas correctas. Quist chaschuna üna granda lavur chi po pü prubabel gnir purteda dal persunel existent. A cas pudess gnir impiego persunel extern a temp parziel per sustgnair il proget.

S-chelin ot regiunel

Il president orientescha sur da la discussiun a reguard il s-chelin ot in Engiadin’Ota. Ils presidents da la Plaiv sun decidieu da l’avis cha Zuoz, insembel cul Lyceum, es ün ferm lö da furmaziun e mantegna il s-chelin ot. Tantüna as es adüna aviert da discuter la tematica eir cun otras vschinaunchas. Quist vain comunicho a la Regiun Malögia. Il cussagl es perinclet cul agir.

Contrat Viafier Retica

La spüerta da la Viafier Retica cha la vschinauncha spordscha a la staziun da Zuoz es suotamissa a nouvas premissas. L’indemnisaziun as müda e vain partida in duos parts, üna part fixa ed üna dependenta dal schmerdsch. La basa da la nouva cunvegna sun las ciffras da l’an 2018 cun ün schmerdsch da frs. 740‘000.00. Per l’an 2018 nu dess que zieva la nouva calculaziun üngüns müdamaints aint ils cuosts. Però es uossa s-chaffida la schanza dad uzzer l’indemnisaziun cun ün schmerdsch pü ot.

01.11.2019/ps

inavous