Decisiuns dal cussagl cumünel november 2020

Fermativas da bus a Zuoz

Eir las fermativas da bus a Zuoz drouvan ün adattamaint causa la ledscha federela davart l’eliminaziun invers persunas cun impedimaints. A Zuoz existan trais fermativas: üna a la Staziun, üna süsom la Via S-charlattina ed üna tar la s-chabellera Chastlatsch. L’adattamaint da la fermativa tar la Staziun vain coordineda culla renovaziun da la Staziun. Per las otras duos fermativas ho la vschinauncha da Zuoz dad incumbenzer büros d’indschegner per offrir progets.

Discussiun partecipaziun „Vereinigung Bündner Gemeinden“

L’associaziun planiseda „Vereinigung Bündner Gemeinden“ dess spordscher üna plattafuorma ed üna ferma vusch da las vschinaunchas commembras invers il Chantun Grischun. Il cussagl cumünel es da l’avis cha las premissas da las vschinaunchas in noss Chantun sun memma diversas per avair üna pusiziun cumünaivla. Scu exaimpel vain numneda l’egualisaziun da finanzas inua ch‘üna part da las vschinaunchas aint il chantun haun da pajer ed otras clappan imports considerabels. Tenor il cussagl cumünel do que otras pussibiliteds, ils grand cusgliers ed ils mezs democratics per as purter aint a Cuira. Il cussagl cumünel decida unanimamaing da na parteciper a la „Vereinigung Bündner Gemeinden“.

Decisiun proget da l’uffizi da god e prievels da natüra – structuras optimelas per la gestiun forestela e tecnica

L’uffizi da god e prievels da natüra spordscha la pussibilited da’s parteciper vi dad ün proget da per examiner structuras optimelas per la gestiun forestela e tecnica. La vschinauncha da S-chanf incumbenzescha l’uffizi per examiner la gestiun forestela e la direcziun operativa da la vschinauncha da Zuoz fo la proposta da’s parteciper al proget causa la stretta collavuraziun dals champs forestel e tecnic ed il potenziel da sinergias in diversas spartas scu persunel, maschinas e veiculs. Ils cuosts per l’incumbenza da’s parteciper s’amuntan ad arduond frs. 3‘000.00. Il cussagl cumünel es unanimamaing da l’avis da deliberer l’import e da’s parteciper vi dal proget.

Dumanda sustegn finanziel Alpintrans GmbH

Zieva cha quista dumanda es già gnida discuteda in cussagl ed eir aint illa cumischiun da turissem as lascha constater seguaints fats: la spüerta dal trenin mellan traunter Zuoz–S-chanf–Prasüras–Varusch vain valüteda scu fich buna ed importanta per la regiun da La Plaiv. Per l’an 2021 dumanda la Alpintrans GmbH, la ditta da la gestiun dal trenin, ün’import totel da frs. 60‘000.00 dal maun public (frs. 20‘000.00 da S-chanf, da Zuoz e dal chantun). Il cussagl cumünel arcugnuoscha l’importanza da la spüerta, ma es da l’avis cha’l sustegn i’l ram dals ultims ans da frs. 10‘000.00 stu bastair. Imsüras economicas sun sgür necessarias e spordschan avuonda pussibiliteds per sgürer la gestiun. Concret es managio il predsch dals bigliets, las pejas dals collavuratuors, ma eir las entredas da sponsoring da l’economia privata. Il cussagl decida unanimamaing da rester tar üna contribuziun da frs. 10‘000.00 per l’an 2021.

Tscherna nouva mnedra maisa da mezdi/structura da di

La plazza da la mnedra da la maisa da mezdi e structuras da di es gnida scritta our duos voutas. Totel sun entredas desch annunzchas, da quellas sun trais gnidas valütedas scu valablas e las persunas sun gnidas invidedas ad intervistas. Displaschaivelmaing nun ho que do üngünas annunzchas da persunas da lingua Rumauntscha. Zieva avair valüto ils discuors fo il cussagl da scoula la proposta da tscherner a duonna Boglarka Plotar scu nouva mnedra da la maisa da mezdi e las structuras da di. Duonna Plotar es Ungiaraisa, marideda e mamma dad ün figl. Ella viva daspö sur desch ans in Svizra ed ho experienza da lavur in diversas spartas. Sper ungiarais discuorra ella tudas-ch, taliaun ed inglais. Il cussagl da scoula fo la proposta da tscherner a duonna Plotar fin a la fin da l’an da scoula e da valüter la situaziun fin lo per a cas prolunger il contrat. Il cussagl cumünel es perinclet e tscherna duonna Plotar cun ün contrat limito.

Infurmaziun Taskforce Corona Engiadina

Il chanzlist infurmescha sur da la furmaziun dals stabs da guida in Engiadin’Ota insembel cun l’ospidel, la ESTM AG ed il stab da guida chantunel per sgürer e coordiner imsüras a reguard COVID-19.

Infurmaziun renovaziun Staziun

Il chanzlist infurmescha sur dal svilup a reguard la renovaziun da la Staziun. Il proget nun es auncha finaliso, diversas dumandas haun auncha da gnir sclaridas. Per la vschinauncha es important da rester landervi culs eventuels progets in connex culla renovaziun: fermativa dal bus, adattamaint Via S-charlattina e la colliaziun cun Vuorcha vers süd-ost.