Publicho: 18.03.2023

Noviteds dal cussagl cumünel

Noviteds dal cussagl cumünel da Zuoz

In sias ultimas tschantedas ho il cussagl cumünel traunter oter tratto e decis sur dal seguaint:

Gruppa da lavur PLAGNOULA

Per cuntinuer il proget dal svilup dad edifizis da scoula ho il cussagl cumünel dumando ün‘offerta dal büro d’architectura Renato Maurizio AG. L’offerta cuntegna duos fasas chi existan our dad ün stüdi per evader trais pussibiliteds:

1. nouva scoulina cun nouva sela da gimnastica in Plagnoula ed evaluer che fer culla sela da gimnastica existenta

2. nouva scoulina in Plagnoula sainza sela da gimnastica

3. nouva sela da gimnastica in Plagnoula e nouva scoulina illa sela da gimnastica existenta.

Our da quista valütaziun as po alura fer üna proposta a maun da la radunanza cumünela. La seguonda fasa da l’offerta cumpiglia l’elavuraziun dal scriver our las lavuors, voul dir la tscherna dal proceder fin tar la publicaziun. In üna terza fasa, chi po pür gnir offrida cur cha’l proceder es definieu, tuocha alura l’organisaziun e la realisaziun dal proceder. Il cussagl cumünel es perinclet cul agir e deliberescha l’import necessari tenor offerta our dal conto da planisaziun per quist proget dal preventiv 2023.

 

Parkegi Centrel – invid offertas ingrandimaint

Avaunt maun es üna skizza proget da la ditta Pini Group. Culla basa dal proget numno decicda il cussagl cumünel dad invider seguantas dittas per offrir:

- Caprez Ingenieure Indschegnier

- Jon Andrea Könz

- Pini Group

L’offerta dess cumpiglier ün preproget ed ün proget da fabrica cun calculaziun da cuosts. Impü basand sün duos variantas, ün proget cun 68 plazzas da parker ed ün cun 80 plazzas da parker.

Tualetta publica

Zieva cha la situaziun cun tualettas publicas i’l minz da la vschinauncha es tres la serreda dal restorant Walther auncha pü noscha, ho il cussagl cumünel decis dad elavurer ün proget dad üna tualetta publica illa Chesa Cumünela. Per elavurer il proget e sclarir las variantas vain incumbenzo il büro d’architectura Klainguti + Rainalter da Zuoz. Previs es da fabricher oura ils indrizs sanitars existents da la sela da gimnastica cun access eir da la Chesa Cumünela.

Scumpart da decasteris dal cussagl cumünel

Zieva la tscherna da sar Flurin Wieser i’l cussagl cumünel decida il cussagl cumünel seguaint scumpart da decasteris a partir dals 8 marz 2023:

- Ramun Ratti: President cumünel ad interim, administraziun, persunel

- Lucian Schucan: Finanzas, provedimaint sociel, scoulas, cultura

- Ladina Tarnuzzer: Turissem

- Cristian Ferrari: Fabricas, planisaziun, provedimaint d’ova, chanalisaziun, pumpiers, iglüminaziun ed immundizchas, stabels cumünels

- Flurin Wieser: Pulizia, agricultura, alps e god

- Christian Florin: Vias, trafic e digitalisaziun

Scu vicepresident ad interim vain tschernieu sar Lucian Schucan

Quist scumpart es valid fin ils 30 gün 2023. A la prüma tschanteda dal cussagl cumünel dal nouv trienni, ils 12 lügl 2023, vain defino il nouv scumpart da decasteris.

 

Imsüras cunter radon – surdeda lavuors

Il conguel da las offertas per realiser las imsüras cunter radon illa chesa da scoula primara resulta in seguaintas surdedas da lavur:

- Indriz ventilaziun: Vitali Haustechnik

- Impressari: Rocca + Hotz AG

- Pittur: Greiner AG

- Falegnam: Mauro Zala

- Tecnica climatica: Bordoni AG

Cun que vegnan ils cuosts totels pel proget a finir tenor surdedas tar ün import totel da CHF 102‘501.40 incl. IPV.

 

Dumandas per sustegn

Il cussagl cumünel aderescha a seguaintas organisaziuns ed occurrenzas sustegn finanziel u in fuorma dad otras prestaziuns:

- Chesa Planta Samedan; per ün mez d’instrucziun da lingua e cultura

- 30 ans Cor Proget

- Tir Chantunel 2024

Download PDF
Tuot las annunzchas ufficielas
A+
A-