Temp liber e sport

Giodair il temp liber e'l sport...

La regiun Engiadina San Murezzan spordscha üna granda spüerta pel temp liber e per fer sport d'inviern scu eir da sted. Quista spüerta unica vain nüzzageda dad indigens e giasts. Cun quatter muntagnas principelas e 350 km pistas da skis, 150 km sendas e 190 km loipas vela l'Engiadina San Murezzan scu üna da las pü grandas destinaziuns pel sport d'inviern da tuot la Svizra. Eir la sted es l'Engiadina ün paradis per glieud activa: ir in muntagna, rampcher, ir a sella e pas-cher, ir cun la barcha a vela u cun l'assa da surf, ir culs inline skates, giuver a golf (Zuoz posseda ün implaunt da golf da 18 fouras) e fer turas cul mountainbike.

...e'ls prodots da chadafö...

La guida turistica Gault-Millau muossa cha'ls giasts nu mangian be bain düraunt il festival Gourmet St. Moritz. La quantited da puncts da Gault-Millau illa val significha effectivmaing "Haute cuisine" sül tet dal muond, causa cha bgers dals restorants da prüma qualited as rechattan sur 1'800 m s.m. Lotiers müda la scenaria scu las specialiteds multifarias. Süllas cartas sun trats da gourmet, specialiteds excellentas da l'Italia chi's rechatta in vicinanza, highlights regiunels scu capuns e'ls evergreens svizzers scu fondue e raclette. In divers cafès, bars e lounges do que da tuot las uras club-sandwiches e buns paninis. Adüna buna per üna degustaziun: La tuorta da nusch engiadinaisa. Ils pastiziers indigens haun raffino quista specialited cun gramma, caramella e nuschs. Uschè nu s'ho be sviluppeda la renumneda specialited "tuorta da nusch engiadinaisa", dimpersè üna tradiziun fich cuntschainta.

...ed ir in sortida.

Bars classicas cuntschaintas, nouvas lounge bars e clubs cun scharm internaziunel sun preschaints impustüt düraunt las nots da la stagiun ota. Vi pel di s'inscuntran bgers indigens e giasts illas bars e süllas terrassas sper e süllas pistas e la saira pel drink d'après-ski in vschinauncha. I'l casino San Murezzan chi's rechatta ill'ela dal vest dal Kempinski Grand Hotel des Bains vain spüert bun divertimaint in ün bel ambiaint, e que na be per glieud chi vuless pruver la furtüna culs gös.

E scha que nun es avuonda...

La natüra fo adüna darcho ster schmort ad indigens e giasts, ün chalender d'occurrenzas multifari ed ün vast program da cultura nu laschan mê gnir lungurus in Engiadina. E scha's vuless vzair qualchosa oter, as po giodair ün "Gelato" sülla plazza da Poschiavo u fer üna spassageda illa vschinauncha idillica da Soglio in Bergiaglia. Eir fich interessantas sun üna visita illa clostra a Müstair u i'l museum dal Parc Naziunel a Zernez u fer üna gita in Engiadina Bassa u in Italia chi's rechatta in vicinanza.

Societeds

A+
A-